呔媽專欄#250|我的單親快樂童年

過去一個週日,我冇跟老公同兩個仔去食晏,又冇陪佢哋去打波。難得唔使湊仔,決定全日昏睡,一直睡到晚上9點半。大仔刷緊牙預備上牀睡,佢忍唔住同我講嘢,試圖整醒我,哈哈!原來老公話佢想叫醒我好耐,次次被老公制止,話要畀媽咪睡多啲。結果大仔同我講嘢,我醒咗,佢好開心,話臨睡前可以攬住我嚟錫,細佬都錫我先睡,係佢哋每晚習慣。

大仔睡前,走埋嚟同我講:媽咪呀,你睡咗成日,頭先響廳呢,得我哋同爸爸,冇咗你同爸爸講笑,你又笑佢又笑,唔同平時好開心咁,我覺得好唔習慣呀!其實我都有啲唔開心..所以我一路想你快啲醒。聽完佢咁講,我忽然明白到,原來屋企嘅氣氛,一個歡樂嘅家庭,爸爸媽媽好開心咁笑,對於小朋友嚟講係咁重要。佢哋見到我哋開心,佢哋都會跟住開心,同樣,佢哋見到我哋黑口黑面唔出聲,情緒亦會跟住變差。

呔媽專欄250我的單親快樂童年

聽到大仔講呢句說話嘅時候,我有啲鼻酸酸,係動容嘅。我將佢嘅說話貼咗上Facebook Page,其中一個網友留言,話好明白大仔嘅感覺,覺得完整家庭對小朋友嚟講係好重要,覺得自己作為單親媽媽,對子女會有虧欠。我睇完有點心痛,我怕自己撩起別人嘅傷心事。我想講,我係單親家庭長大,媽咪一個湊大我同哥哥,我從來唔覺得媽咪虧欠過我,係完全冇呢個感覺。大家成日聽嘅,話單親小朋友會諗,點解人人都有爸爸,我冇嘅? 由細到大,我都冇因為冇爸爸而唔開心過,可能媽咪做得太足夠,我個童年過得好快樂。

 

呔媽專欄250我的單親快樂童年

一個開心又完整嘅家庭,小朋友有爸爸媽媽,當然最好,但就算唔完整,只要屋企夠快樂,家庭氣氛夠好,小朋友一樣可以幸福快樂成長,就如我。人大了,明白好多嘢唔係一加一等於二咁簡單,如果你問我,想響一個完整但唔開心,日日家嘈屋閉嘅環境成長,定係單親但快樂的,溫暖的,我一定揀後者,而其實我根本就係後者。

朋友們可能知道,我冇爸爸係因為佢響我大約6歲時離世了,但其實,我未同過爸爸一齊生活。只記得細細個,爸爸個個禮拜會返嚟飲湯食飯,次次都好肉緊咁攬住我唔放,又鍾意用鬚「吉」我塊面。媽咪話佢工作日夜癲倒,為方便工作,在外租住。好多好多年之後,我一次偶然發現,原來爸爸媽媽響我一歲嘅時候,離婚了。雖然爸爸一早唔響度,但知道果刻我喊咗一程巴士,兜咗個幾鐘又原車折返,我竟然接受唔到。

呔媽專欄250我的單親快樂童年

自己做咗人媽咪,果刻我好心痛我媽咪當時係點樣捱過去,帶住只有4歲嘅哥哥,1歲嘅我。我好感激佢,我相信佢當年做呢個決定,一定係為我同阿哥好,佢知道同爸爸一齊唔會開心,我同哥哥亦只能在爭吵中成長,所以明知辛苦,佢選擇寧願一個人帶住我哋,母兼父職。可以畀到我一個我完全唔覺得欠缺任何嘢嘅童年,可以完全掩飾自己傷心,將我哋擺到最前,自己擺到最後,佢真係好堅強,好偉大!所以呢,呢個世界,其實冇話邊個虧欠了邊個,只要愛錫小朋友,就算單親又如何? 一樣可以畀到小朋友最安穩最快樂嘅成長。大家都要加油,開開心心生活呀!!

advertisement