advertisement

呔媽認同兒子反抗老師指示做對了嗎

響兩個仔成長過程當中,發生過好多事,我內心亦經歷過無數矛盾,掙扎。因為每次有事發生,我都好想藉住果件事去做一次教材,希望下次再有類同事件發生時,佢哋識用一個正面嘅心態去面對,去做決定。而我內心嘅矛盾係,其實我做得啱唔啱?我咁樣教又啱唔啱?我好怕自己教錯仔,好怕兩個仔學錯我。

講件掙扎事畀你哋聽,睇下你哋又覺得點。四年級阿仔,某日一放學同我講自己當日好大鑊,話佢上堂畫緊一張poster,佢埋頭苦畫,畫到聽唔到老師指示,原來已經要做下一part,係寫文字。當大家同學都寫緊嘢嘅時候,老師見佢仲油緊顏色,話佢冇聽指示,叫佢擺張poster去recycle bin,即係唔好要喇!佢當時有聽老師講,放咗張紙去recycle,但轉頭趁老師唔發覺,佢就執番張紙,仲混入其他同學嘅poster中,一齊交咗。佢話成個過程好驚險呀!佢當時好緊張!原來有同學見到問佢,老師唔係叫你拎張紙去recycle嗎? 佢答同學,係呀我真有拎去掉,不過之後取番。同學冇出聲,覺得佢好勇敢!因為阿仔呢個老師,出名嚴厲,好多同學都好驚佢。其實唔只同學,連家長都聞風喪膽,包括我,哈哈!

我聽完阿仔咁講,第一句係:我覺得你做得好啱喎!咁你自己覺得呢?然後阿仔話,都唔知呀,好驚好緊張㗎!好驚佢見到,要好似小偷咁。之後同學又見到,又驚佢話畀老師知,好彩佢冇咋!呼~

呔媽認同兒子反抗老師指示做對了嗎

對我嚟講,呢件事其實好得意,好多嘢值得我同個仔討論,我要慢慢逐樣解釋佢知,點解我覺得佢做得好好。

第一,老師畀你嘅指示,你真係冇聽到,呢個一定係你錯,所以你聽老師講,去recycle咗張紙,係做得好啱!唔可以響成班同學面前逆老師意,你要尊重老師嘅決定,原因係你真係有錯在先。老師亦得到佢想要嘅威嚴,所謂殺一警百,同學們從此會更加認真聽指示,不敢怠慢,對老師同同學都係好事。

第二,你取回張紙,亦都冇做錯。因為張紙係你好畀心機去畫,係屬於你,我覺得你盡力去爭取屬於自己嘅嘢係做得好好!呢個行為好勇敢,特別是對住一個咁嚴厲嘅老師,唔係人人有呢個膽量。如果你問我,我會認為個懲罰可以係,唔畀分數呢個project,或者一啲關於呢份功課嘅嘢,而唔係叫佢一嘢掉落垃圾桶,咁樣同兜巴刮冇分別,係踐踏小朋友自尊心。

 

當然,我好明白,四年級老師要對住30個學生,唔同我教仔咁易控制,好多時強權就係公理。等於當你冇時間教仔嘅時候,你會發癲打佢兩巴,等佢以後會怕咗你,會好聽話,你唔使再花時間說教。但事實係咪如此?就算真係,呢個惡果遲早好似回力標咁,飛番轉頭,去番你度。

我話阿仔做得啱,並唔係叫佢亂咁反佢老師,而係要畀佢知道,老師都會做錯決定。如果覺得自己有道理,就要提出,要解決,唔可以一味服從。四年級了,10歲半,有思想,要識得開始分析事件。換句說話講,你阿爸打你,你都要識分辨佢係拎你嚟發洩,定真心想教好你,兩回事嚟,個出發點好重要。

第三,我問阿仔有冇諗過點解同學見到,冇篤你出嚟?係因為友誼。計埋幼稚園果年,第5年做同學,你哋之間係有friendship,會互相支持,互相幫忙。友誼好重要,你哋對住同學嘅時間同對住爸爸媽媽差唔多,響對方身上亦學習唔少,所以要知道朋友嘅重要性。平時多啲關心同學,有事主動幫忙,遇事唔好縮沙,有責任感唔好卸膊,對朋友都要有承擔,特別是係男仔。今次又順便教埋佢哋social life,識同同學相處,學校生活會開心好多好多。

所以你問我,其實我幾想佢哋多啲唔同嘅事發生,唔好太過一帆風順。每件事發生,都係成長嘅最佳學習,正面啲去睇,經歷挫敗,自己諗辦法面對,企番起身,成個過程好正㗎!阿仔話佢第一次做呢件事,好似做賊咁,好緊張,我鄧佢好興奮!嚟緊仲有好多刺激的第一次,希望我哋可以好似朋友咁樣分享,我好期待。