呔媽專欄#251｜新手媽咪「職安健」

今次想同大家分享下，湊BB要注意嘅筋骨問題。我湊咗兩個仔10年，啲毛病開始逐樣浮面，而且冇得補救，只能減輕徵狀，減慢筋骨退化，所以想大家都可以及早注意，有個警惕，趁後生開始保養身體，第時老咗都舒舒服服。

我廿幾歲生小朋友，阿哥15個月大，細佬就出世喇！阿哥幾個月大時，我就已經媽媽手，因為日夜托住佢咁餵人奶，又成日抱佢，隻肥仔重得快，條手筋頂唔順發炎。到而家就算好番，右手都發唔到力，感覺好易拉一拉又傷過，所以都唔敢亂用力。如果要抱BB，盡量坐底抱，畀佢挨住自己，或搵嘢托住佢，唔好企住抱。雙手唔好hold住一個動作太耐，久不久要伸展，開合同慢慢轉圈，有助舒緩雙手筋骨。

果時恃住後生，平時有做開運動，又壯又大力，都好過份㗎！記得有一年，我一個帶佢兩個返香港，一個3歲半，一個2歲。我果幾個月出街，就用背帶揹細佬，BB車推阿哥。上落地鐵站，我會揹住細佬，成架BB車托住上落樓梯，都真係幾癲。我心急呀！最驚四圍搵lift，搵到又入唔到，等到天荒地老。然後我發現，香港嘅地鐵設計真係超級騎呢！可以一截係電梯，然後中間果截係樓梯嚟㗎喎！仲要係冇電梯上返去㗎，單程上或落。我地行得走得又話OK，人地真係有需要，行路不便嘅，落得一半，都唔知想點。

都係果句，恃住後生，又冇任何痛症，點會諗要保養吖，而家知死喇。同好多人一樣，我係開始盤骨大髀骨痛，仲要痛咗一排，睡得差，先去睇脊骨科。畀醫生摸，佢都未照Xray，就咁都摸到我左邊盤骨高過右邊，所以條腰歪埋一邊，成日責住一邊啲肌肉，引起痛症。呢個就係我多年抱仔唔換手嘅問題，我慣咗右手抱，亦因為佢地好重，我一抱就習慣用條腰頂住借力，日子耐咗就高低盤骨了。呢個大家記住，抱仔要換手，總之所有用力嘅都要平衡，唔好死用一邊，會好傷。另一樣想提提大家，唔好用Sling 斜揹款BB帶，因為BB重量唔平衡，長時間側埋一邊，腰會歪。用番兩肩背帶式BB帶，比較適合。佢地大個喇，開始重就唔好抱咁多，保重番自己要緊。另外日常生活，例如烏低身幫佢地沖涼之類，容易令脊骨受壓嘅姿態，都要注意，跪時可以用厚pad卸卸力。講埋最影響嚴重，但好難戒甩嘅，繞腳！真係唔好繞腳呀！盤骨會歪㗎！

另外就係頸骨，照到骨無問題，但低位骨與骨之間嘅Gel狀物，有一格比較少咗，所以兩骨距離近了，不是好事。原因一定係用電話，個頭耷低，頸骨長期受壓引致。呢個如果自己唔改善，遲啲肌肉增生去support頸骨，就變成大家好驚嘅生骨刺喇！痛死㗎！所以大家都要注意唔好耷頭篤電話，醫生話睇電話時另一隻手zip落格肋底，就自然會托高咗個電話，大家可以習慣用呢招。

咁點樣可以舒緩我嘅痛症呢？答案就係拉筋，拉筋，同拉筋。唔好睇少每日拉筋拉鬆個人，原來真係好重要！醫生話勞損了嘅地方，軟組織冇咗唔會再生長，但我地可以每日拉筋去減慢同防止佢老化。除咗拉筋，醫生建議食Glucosamine with MSM(葡萄糖氨)，保筋骨聖品。

最後，介紹你地一個，我鍾意跟佢做拉筋嘅外國癲仔，佢拍啲片好搞笑，啲舒緩痛症嘅動作，簡單但好有效。有興趣上Facebook - Idan Krishner Yoga（>> 點此前往），佢係一個瑜伽導師。