advertisement

呔媽專欄#253|愈係上心,鬧得愈甘

原來同小朋友傾計,可以解決好多問題,唔傾過都唔知,傾計係咁有用。平時教仔,同佢哋講呢樣解釋果樣,佢哋又幾聽話,對我同爸爸講嘅嘢會上心,所以我好少發火,佢哋行為尚算良好。可能因為咁,我好少會捉佢哋認真對話,講自己內心感受,平時傾計當然有,佢哋咩都講一餐的,但好少會專登單對單同佢哋傾計。

日前發生咗件火滾事,我對上一次發火已經係一年前大仔整到細佬個嘴流血。今次又係大仔,拉細佬張凳整跌佢,激到我爆氣大鬧。由於太嬲,我呢幾日都唔理睬大仔,等佢知道事件嚴重,加上自己情緒都需要時間平復,等冷靜落嚟,我決定同大仔嚟一次認真對話,為呢件事傾一次計。我覺得有問題發生,自己忍唔住發癲大鬧,然後嬲咗佢,嬲完,跟住點呢?其實個問題並冇解決到,所以響我睬返佢之前,我要同佢認真咁討論番個問題,對與錯,應該點改善。
大仔10歲半,有媽媽朋友話可能開始踏入青春期,呢啲情緒嘢,一定要好好處理。而家處理得唔好,佢心中有鬱結嘅話,會對佢反叛期成長有壞影響。其實呢個我好明白,自己都經歷過,當年同媽咪開火,佢一句得埋嚟,難聽嘅唔公道嘅說話,真係會記一世,咁而家梗係知道係氣話,但細個又點識諗咁多吖,聽完只會愈來愈反叛。所以今次自己爆完氣,都有啲笠水,驚大仔將啲說話擺響心上,鬱鬱不歡。

呔媽專欄#253|愈係上心,鬧得愈甘

同大仔入房傾計,同佢傾番件事係點,問佢點解要咁做,出於咩心態要咁樣整細佬。佢講咗佢咁做嘅原因,係一時之氣,佢自己知道好唔啱,佢亦有講如果當時諗到個後果,佢一定唔會咁做,唔係有心傷害佢。我教佢,好多嚴重嘢發生就係一時之氣,如果下次突然激動,可以深呼吸,數10下,然後你會覺得其實都冇咩大不了。呢招好有用,因為我好激動嘅時候,都係靠咬實牙深呼吸嚟冷靜自己。

知道佢唔係故意,我有問佢,其實佢錫唔錫細佬,我好想知佢內心諗咩,覺得同細佬關係如何。佢話好多時都錫,但係細佬成日嘴gel gel話佢,佢就唔鍾意,同埋見到細佬好懶叻個樣,就想整佢,等佢冇得咁得戚。其實係啲好無聊嘅嘢,但唔傾過,我真係唔知佢咁諗,佢講果時好認真。佢話如果有人蝦細佬,佢會衝過去打果個人,保護細佬,唔會想冇咗佢。咁即係唔係內心憎恨細佬,我都放心,因為有朋友提過,會唔會佢唔鍾意細佬所以成日整佢,其實又唔會,因為我哋冇偏心,加佢哋平時friend過打band,只係我想確定一下。

 

 

然後我問佢,處理件事方面,覺得媽咪有冇做錯,我咁樣鬧佢,佢覺得點?佢嘅答案我有啲意外。佢話覺得我做得好啱,話如果我唔發癲,是但hea過就算,佢會覺得係好小事,下次可能又會再犯。佢話我會發癲嘅一定係好嚴重,因為我平時好冷靜,所以佢覺得我應該要咁做,佢先會驚,先會記得。我聽完有啲心痛,因為我真係鬧得佢好甘,但佢竟然明白我,體諒我,我好感動個仔原來已經懂事。我有為自己過份激動而抱歉,咩原因都好,始終發癲唔係好榜樣,大人做咗唔好嘅示範都要承認,小朋友先會覺得公平,被尊重。

呔媽專欄#253|愈係上心,鬧得愈甘

啲仔一路成長,我都要跟住成長,經過今次同大仔傾計,我好開心知道佢嘅想法,原來同我諗嘅好唔同。我覺得可以叫埋細佬一齊傾,有咩鍾意唔鍾意都講,等佢哋習慣同對方傾訴,用溝通嚟處理問題。原來「子女好與壞,在乎溝通與關懷」係真㗎!溝通真係好重要!