呔媽專欄#256|升中派位後感:成績好日後會平步青雲?

身邊好多朋友嘅小朋友,今年升中學。為咗派位一事,大家非常緊張,壓力爆燈。朋友們除咗心急等派位之外,預備派得唔好,要去心儀學校叩門嘅預備工夫,亦令人十分疲憊。近呢十幾年,香港教育制度變化,鼓吹成績上競爭嘅風氣,唔單止令小朋友失去快樂童年,亦令家長們承受巨大壓力。好多朋友都有因為成績功課問題,同小朋友關係惡化,屋企氣氛好差。即使催谷到成績,但賠上了感情,實在唔值得。

呔媽升中派位後感

老土講句,成績不是一切。小朋友成績好,當然高興,但成績一般的,其實都好多出路。正所謂沒有最好嘅學校,只有最適合嘅學校!每間學校都有佢自己嘅特質,即使唔係出名學術好,但可能係最適合你小朋友嘅一間,好與壞,唔只係睇成績,都有好多嘢要考慮。學校風氣,校長老師同學,反而選擇一間讀得舒服又啱自己嘅學校,開開心心完成課程,會係小朋友踏上成功人生嘅台階。

呔媽升中派位後感

講樣幾有趣嘅嘢畀大家聽,你就會明白即使入到名校,亦未必係你心中所想,小朋友入到就一定平步青雲。有幾個響大公司做高層嘅朋友,大家傾開,討論近呢幾年嚟公司見工嘅年輕人,剛從名牌大學畢業出嚟搵工作,大部份成績彪炳,可惜人際關係好差,完全同其他同事夾唔到,溝通出現問題,最後都係被辭退。

然後佢哋發覺呢一堆讀書好叻嘅人,都有個共通點,唔識做人!唔知係咪將啲時間全部用晒嚟讀書,定屋企人只顧催谷佢哋學業,冇教佢哋做人處事嘅種種。朋友們不約而同,認為寧願請成績一般的,但懂得做人處事、上進,又有禮貌嘅年輕人,亦比較謙卑,受教。

呔媽升中派位後感

然後我哋都覺得,讀書多年,到大學畢業都有成20年書齡了。呢20年係咪只著重成績呢?我反而覺得,呢段時間除咗知識,最重要嘅係學習點樣同人相處,建立自己對唔同事物嘅正確觀點。我教兩個仔,學校就好似一個小社會,咩人都有,咩事都會發生,你哋返學就係要學習面對唔同嘅人,唔同嘅事,解決唔同嘅問題。而最重要嘅,係點樣可以同所有人都相處融洽,老師同學,人人唔同性格,要每日都過得開心,其實唔容易。

當然,識禮知書,懂得禮儀重要,熟識詩書亦然,兩者就取個平衡吧!只要記住,成績唔係所有,品德性格都係小朋友將來成功嘅主因。

advertisement