呔媽專欄#258|好孩子不篤灰!呔仔學做有道義的少年

呔仔學做有道義的少年

新學年開始,大仔升五年級了。湊仔嚟講,真係細有細擔憂,大又有大煩惱,每個階段都有唔同教育學問。而家佢哋10歲、11歲,要重點說教嘅大部份係日常生活中對家人朋友同學嘅相處。禮儀、態度,及至開始想佢哋明白好多嘢唔係非黑即白,呢個世界有樣嘢叫道義。唔係話你覺得自己啱,就應該要咁做,要做,都應該顧及下別人感受,以及事後後果等等。

係唔容易,亦唔係一教就明(教呢啲先費神)。老實講,好多時我哋大人,都要活到某個年紀,撞好多次板,受過傷或者害過人,先漸漸明白到某啲道理,先唔會再重複犯。話雖如此,教到就教啦,聽唔聽得明一回事,可能長大後某時某刻會諗起爸爸媽媽講過呢啲說話,會有一刻感動嘅。

話說大仔日前放學,同我講話呢個禮拜嚟咗個插班生,新同學幾好幾乖。然後佢同我講,佢話咗畀新同學知某同學啲冇品行為,例如係撩鼻屎揩落人哋,又鍾意響人背後咳唔掩口,仲有成日放屁,平時又唔聽老師話等等。小學生不外乎屎尿屁,個同學又係麻鬼煩嘅!但我聽到時,就覺得個仔唔啱,點可以響新同學面前,咁樣唱衰另一同學,講佢壞話,我責備大仔,點知佢覺得佢講嘅係事實,冇錯喎!

呔仔學做有道義的少年

嗯,我就教大仔,雖然你講嘅係事實,但有冇諗過,可能佢放完暑假之後,有人教好咗佢,佢唔會再做呢啲行為呢?但就因為你咁樣講,新同學對佢已經有個壞印象,對佢冇好感,又或唔想同佢玩,咁咪對個同學好唔公平囉!可能人哋有緣份,兩個會做好朋友呢? 可能個同學對新同學好好,唔同對你哋呢?好難講㗎喎!但你就抹煞咗人哋做好朋友嘅機會喇,我覺得好唔啱。即使你覺得新同學遲早都會知,咪等人哋知道,佢嚟同你講果時,你再去開解佢囉,又或者你想保住個同學嘅,到時幫佢講幾句好說話又得。總之點講都唔係你走去做八公,講別人壞話吧!咁樣係好冇道義㗎!仲要人哋係新同學啱啱識,而舊同學同你一齊咁多年,都係緣份吖!

然後,我叫佢換轉角度諗諗,如果你係個同學,畀人咁樣話你,你感覺又如何呢?做錯事永不翻身嗎?大仔聽完,就真係用心諗,話覺得我講得都啱。其實有時好多問題發生,就在於你會唔會忍一忍、停一停,諗清楚先去講去做,特別是朋友關係,豁達啲,每個人都有佢嘅優點,同埋真係唔啱玩,咪少啲接觸囉,都唔使對佢衰嘅!不過呢啲智慧,都唔預期佢哋咁細個會明白,但希望講咗教咗,佢哋會慢慢學習消化,再遇同類事情可以處理得好啲,人際關係好,成長係開心好多的。

到爸爸放工返嚟,大仔又重覆一次呢件事畀爸爸聽。我響房聽到,老公同大仔講埋同我差唔多一模一樣嘅說話!好奇妙呀!可能呢個就係共同教仔10年嘅默契吧!

 

advertisement