呔媽專欄#260|呔仔進化好男人 beta 挺身而出保護小夥伴

呔媽專欄260呔仔進化好男人beta-挺身而出保護小夥伴

記錄一下小朋友成長,經常會遇到嘅事。

上個禮拜,兩個仔同朋友兩個女參加足球班,佢哋呢幾個年紀差唔多,8到11歲咗右,踢埋同一組。完場後,佢哋四個留咗響公園玩,我哋四個大人就繼續響草哋踢波。玩到中途,大仔驚慌走嚟同我哋講,頭先有個小朋友講 bad words 話兩個妹,佢就同對方嘈,鬥鬧,仲話佢哋識好多衰字。問佢最後點,佢話鬧完就走咗,冇理佢哋。

呔媽專欄260呔仔進化好男人beta-挺身而出保護小夥伴

呢啲事其實響公園成日會發生,唔知點樣你話下我,我又話下你。我教兩個仔,人哋講咩其實唔使咁投入,又唔識佢嘅!最好唔好畀反應,對方就自然冇癮,如果太過份,咪回佢兩句囉。最重要係記住千祈唔好出手打人推人,所謂君子動口不動手,無論咩情況,出手就一定唔啱!但,如果對方先出手,你可以選擇還手,我覺得年青人需要適當哋自衛!

叮囑兩個仔再去玩時小心啲,唔好理搞事嘅小朋友,大家保護大家。老實講,10歲8歲呢啲年紀,係時候自己出去體驗下學校以外嘅小社會,有事發生點樣反應,點樣解決。我專登唔跟埋去(遠望到嘅距離),唔想棟響隔離吼住,唔想佢哋有事即刻嗌媽咪。然後過咗一陣,大細仔一齊跑過嚟,話我知搞事小朋友響哋下執啲木碎掉佢哋,佢哋又同佢嘈兩句,但之後有個印度爸爸介入事件,叫停咗搞事小朋友,仲帶咗佢哋去搵佢哋父母。

我同大仔行去公園了解事件,行到去就見到印度爸爸,佢即刻同我講發生咩事。頭先冇大人響度,兩邊細路響度嘈,搞事小朋友開始掉木碎,佢就叫停咗同埋話咗畀對方父母知。我望過去,似係一群亞洲父母,兩個搞事小朋友年紀細好多嘅,大約5,6歲,仲好惡咁啤緊嚟我哋呢邊。大仔拉住我叫我唔好搞事,我感覺好新奇呀喂!第一次聽我個仔叫我唔好搞事,可能我個樣好嬲豬,佢驚我過去發癲,哈哈!

冇嘅,我同個仔講,要坐響度一陣,畀對方睇到你都有父母響度。你又唔知佢哋同大人講咩,可能調番轉話你哋掉木碎先,佢父母過嚟鬧你一鑊,都唔抵啦係咪? 呢啲唔係咩大事,唔需要攻,但守住都係正常。問番成件事係點,原來...

一開始係大家響公園玩,搞事小朋友問兩個妹數學題,兩個妹唔識答,佢哋就話佢stupid girls,又講bad words,大仔見狀保護兩個妹,一人一句就嘈起上嚟。嘈完兩句,之後就嚟咗同我哋講,再返去玩時,遇返搞事小朋友,對方就一路啤住同跟住大細仔,仲向佢哋掉木碎,然後見到事發經過嘅印度爸爸就出聲維持治安喇!

呢件事我覺得兩個仔做得幾好。第一,從小教導男仔係要保護女仔/弱小/老人家等,大仔不嬲比較怕事,但竟然有事發生時會保護同伴,冇閃咗去,叻!第二,畀人出口侮辱,冇畀憤怒沖昏頭腦,冇出手,叻!第三,呢個亦係我見到啲仔上咗小學後嘅進步,係識得好仔細咁講番發生嘅事,然後當聽到印度爸爸講得唔夠清楚時,佢會響隔離一路補充自己,唔會畀人講晒,自己冇say,我覺得呢樣好重要,雖然係細路,但唔係人哋話我咩我都要接受!

呔媽專欄260呔仔進化好男人beta-挺身而出保護小夥伴

最後,請大家諗一諗,點解一個6歲嘅細路,會抱住傲慢嘅態度去問8歲嘅姐姐一啲未學到嘅數學題,人哋唔識就話佢蠢!唔該大家做父母嘅,唔好再破壞學習生態!唔好再畀自己啲細路,1年級去學埋3年級嘅嘢!!美國啲老師已經講咗,上堂係一同學習,同學們同時接觸新課程係好重要,大家會有學習新知識嘅樂趣同驚喜。某部份同學一早學識嘅話,除咗會令該同學無心上堂聽書之餘,亦同樣影響整體學習氣氛同反應,所以老師反對額外補課,除非同學跟唔上基本課程。

 

advertisement