advertisement

每年開學,學校都會舉行一個Back to School Night,家長需要出席。各班老師們,大概會講述嚟緊呢一年,課堂嘅科目日程,教育局要求學生合格嘅考試,同埋當學期完結時,小朋友達到咩教育程度等等。然後,當然就係舉手分工,因為每班廿幾個學生,所有preparation都係班主任一個去做,上堂前後嘅功夫,改功課改卷,真係做到班老師爆計。

講番少少,記得細個讀小學,每科都有唔同老師入課室教,可能有時一個老師會教兩科?印象中都係英文加體育,一文一武咁,好少話教中文果個又教埋數學。但美國呢邊,小學嘅老師係全科一腳踢咁滯,班主任負責最主要果幾科,可能音樂,P.E.之類就其他老師補上。可幸嘅係,課程冇香港咁緊湊,但如果冇人幫手,工作量真係好大。

呔媽專欄#259|心太軟連任家長義工
好喇,果晚返學校聽完大仔啲嘢,再去聽埋細仔,然後我又神推鬼擁咁行返去大仔課室時,畀個家長捉住咗。原來佢話大仔果班,完全冇人肯volunteer幫手,講時都幾無奈。呢個家長N,應該叫戰友,因為佢係PTA主員,呢幾年事無大小我見到佢,日日響學校遊走。其實有幾個佢呢啲角色,非常盡心盡力幫學校統籌,搞好多活動,令班學生嘅學習生活有趣好多!

當然,你可能話好多家長都要返工,唔係咁多人有時間做學校啲嘢,但以正常生態嚟講,一班廿幾個學生,冇一個阿爸阿媽有時間幫手,而講緊幫手只係每星期大約幫1個小時。加上你肯幫手,老師係會完全就晒你時間,可以送返學時,接放學前後,你肯幫手就算幫半個鐘,老師都已經好感激。

老實講,今年我係一心諗住唔幫手嘅,所以張紙我一開始冇sign up!由大仔入學開始,過去五年都係熟口熟面呢班阿媽,喂真係迫下啲人負責番少少啦,始終你個小朋友有份讀書,有份受惠,點可以咁自私㗎!我送完仔,好多時都見有班阿媽企響學校門口吹水,有咁嘅時間閒情,又唔會幫手貢獻下,唉⋯

之前幫大仔果班加埋隔離班影印,企咗響Copy Room成粒鐘,戰友K 經過打招呼。呢個又係猛料,我諗佢熟悉晒成間學校嘅每一角落,我琴日jam紙搞咗好耐都搞唔掂,佢兩下手腳已經搞掂,仲知入面邊個位有塊嘢會𠝹損手,叫我唔好伸入去,勁!然後大家就開始講,年年都係我哋呢班人,下年啲細路畢業,班老師唔知點算!佢話低年級果班家長仲差,冇人肯參與,連PTA都有啲青黃不接,我地呢班走晒,學校啲嘢真係唔知點算。你哋睇,有責任心嘅人,係會諗埋自己走咗之後嘅顧慮,真係一樣米養百樣人。

琴日入Copy Room見到又係家長S,我哋一齊爆笑話,今年又係你呀?我同佢講我係衰心軟,大佬呀你一個幫手都冇,老師幾有passion都心淡啦,好慘㗎個感覺,我真係唔忍心。平時都教兩個仔,幫到人係自己開心,畀人幫果個又會覺得人間有情,原來有人幫自己係咁美好,自然又會有心幫番其他人。呢個絕對會係一個良性循環,我哋個社會就係需要呢樣嘢,需要感受愛。多多少少,每個人都有需要幫助嘅時候,希望大家都可以熱心啲,做個好榜樣,令世界更有愛。