呔媽專欄#262|呔仔收咗掩口費?!

某日放學,大仔同我講,「今日 S 同學畀左一蚊我呀!」我覺得好奇,點解同學會無啦啦畀錢你㗎? 「因為 lunch time 我見到佢同另一個同學 share food,學校唔畀 share food 㗎!佢話驚我 tell on 佢,所以畀咗一蚊我,叫我唔好話畀老師聽。」噢!原來係咁,我教佢,呢個我哋香港人俗稱掩口費,即係做咗衰嘢畀人發現咗,就畀啲錢你掩住你把口,你收咗錢就等於你承諾唔會話畀人知,唔會篤佢背脊,同時亦代表你同佢地同流合污。

呔媽專欄呔仔收咗掩口費

呢件事聽起嚟,好似冇咩問題,幾個同學自己拆得掂,而 share food 亦唔係真係咩大事,其實我間中都見班同學仔試食大家帶返學校嘅零食。不過在我嚟講,學校就係一個預演小社會,響度養成咗嘅習慣,會帶上中學大學,會變成以後做人嘅態度。因此,我覺得有必要誇張少少去放大呢件事,引伸去更嚴重嘅例子,去教個仔點樣處理呢類情況。

第一,我叫佢聽日返學,要比番一蚊呢個同學。佢回答我呢個同學同佢講,一蚊好少錢,佢唔要番喇,佢唔 care。首先,呢個唔係金額問題,一蚊又好一百蚊又好,呢個係掩口費,係代表你接受佢要求你唔好話畀老師聽佢做嘅壞事,係代表你願意同佢衰埋一堆,同流合污。你又冇參與過非法行為,做咩你望到佢地 share food 就要被拉埋落水先? 所以你一定要畀返佢,驗明正身!但唔代表你要篤佢背脊,呢個只係要清晰番件事與你無關。

第二,收人掩口費係一個極度戇居嘅行為。壞事唔係你做,從中得益冇你份,但最後有分被制裁。就算捉你唔到,你收咗人錢唔講真話,亦顯得你個人毫無誠信,為錢冇人格!你冇收人錢,正正直直,你覺得件事嚴重嘅,可以話畀老師知,甚至可以報警伸張正義!正所謂做人最緊要有得揀,你有得選擇講定唔講,但你同流合污後,只能眼白白睇住啲不合理同不法事情發生,唔可以出聲指證。如果係嚴重嘅事,個心過意得去嗎? 只能後悔一世!

呔媽專欄呔仔收咗掩口費

第三,舉個例子,你發現班朋友非法種大麻,美國呢邊好興㗎啦!佢地畀筆錢你叫你唔好出聲,唔好報警,咁你又收? 收咗,咁你地同一黨喇喎!呢個情況其實同而家相似,犯法當然嚴重得多,但問題就係你哋從小慣咗做衰嘢畀人發現,就畀着數人地去解決,如果可行,第時大個亦會用同一方法解決問題。知情不報,其實都係錯,咁當然又要睇係咩情況啦,無傷大雅咪得啖笑囉,有得救既咪勸導教化佢囉,又唔好話發現人哋做咩都要即刻篤佢出黎,咁樣就冇朋友㗎喇!

學做人真係唔易,教仔亦真係唔可以懶。我有一刻諗過算數,唔講以上一番話,但我好驚自己後悔,就係因為自己可以教導時得過且過,錯過左好好管教嘅年紀,到佢地中學大學,已經成形,有自己一套思想時,想教都冇得教。因此我從來唔放過任何機會,身教言教,糾正錯誤,希望兩個仔長大後堂堂正正,腳踏實地做個好人。

 

 

advertisement