呔媽專欄#261|「細路仔就係咁㗎啦!」其實係歪理

呔媽專欄#261|「細路仔就係咁㗎啦!」其實係歪理

做父母嘅,大多都聽過,甚至乎都曾經講過呢一句說話:「佢只係個細路仔呀!細路仔就係咁㗎啦!乜你咁大個人同細路仔計較!」好多父母唔管教小朋友,任由小朋友響公眾地方瘋狂騷擾別人,然後佢哋就會講呢啲說話嚟推卸責任。你被騷擾一輪後,再聽到對方大條歪理,會有咩感覺?

當然,自己都有小朋友,都有經歷過佢哋當眾扭計,騷擾到別人時嘅尷尬。有時候小朋友係愈鬧愈反叛,當眾鬧佢,佢都要面,未必會即刻停,呢個就真係要靠平時家教嚴格,唔係一時三刻可以改善。我反而覺得,細路其實幾無辜,乖唔乖,識唔識為人着想,係日常不斷教導,但如果連大人面對呢啲問題時,都係推卸,唔認錯,就難怪小朋友有咁樣行為了,所謂家教,身教比言教更重要。

(呔媽昔日文章: 別只在街上管教小孩)
過去週末,一家人出外Lunch,去到一間牛肉粉店,一坐落,個氣場唔係好妥。前面一大枱,4個大人5個細路,細路們大約6-8歲。隔離枱坐住2個稍肥中年男女,望一望我,個樣嬲嬲豬。冇幾耐,大枱嘅小朋友們就開始叫囂,都真係幾尖聲,可能我自己有小朋友,個忍受能力同同理心會高啲,尚可接受,未太厭惡。

佢哋一尖叫,隔離枱肥男人就嗌過去喇,類似話:餐廳係公眾地方,唔應該有小朋友尖叫!細路爸爸畀人鬧都好尷尬下,聽到佢盡量控制,可惜冇人聽佢支笛,話完停一停又嚟過。當然,肥男人又爆過啦!你一句我一句,兩邊開始嘈,不外乎都係我一開始講果啲 細路點點點,夾雜歪理,肥男人愈聽愈嬲,仲爆埋粗!見班大人鬧交,班細路即刻靜晒...呢個時候,肥男人講咗一句好精彩嘅!

「你睇,而家佢哋完全唔出聲喇!!」

你哋聽唔聽得出呢句嘢幾堅呀??即係串緊果4個大人,你哋班細路咁放肆,係你哋唔教,唔鬧佢哋!你睇,我一大聲喝,個個靜晒邊敢嘈!呢樣我係認同嘅,自己有好好管教,又邊使街外人幫你教吖唉!然後4個父母口噏噏,肥男人又繼續同佢朋友單單打打,之後食完就走咗。

事後我同老公都認為,肥男人鬧得冇錯,人哋畀錢出街食嘢,梗係想慢慢享受,佢冇必要忍受因你唔教仔而帶來嘅騷擾。同埋相信響我哋入坐之前,班細路已經嗌咗一排,肥男人先會咁嘅心情。不過有一樣嘢大家都覺得,肥男人唔應該爆粗嘅!其實道理人人皆知,但當你響細路仔前爆粗,就突然由有道理變咗冇道理,甚至會覺得你錯。呢啲情況係氣憤嘅,所以借鏡教仔,叫佢哋睇下響餐廳大聲,胡亂叫玩,係幾黑人憎!大個仔喇,要學習響適當場合做適當行為,凡事以不打擾別人為首吧!

advertisement