呔媽專欄#264|過來人分享,如何適應移民後生活?

呔媽專欄#264|過來人分享,如何適應移民後生活?

香港社會氣氛緊張,以致大家又出現移民外國嘅想法。之前寫過關於我對舉家移民外國嘅一啲意見,今次又講下如何適應當地生活,入學情況等等。近年多咗好多旅遊特輯,加上有時電影會取景美國三藩市,大家可能對三藩市已有印象,但當年,我係完全零概念,完全唔知將會定居嘅會係一個點樣嘅地方,更加唔知美國嘅學校係咩環境。

好幸運,好快我就發現三藩市係一個聯合國,差唔多你講得出嘅種族都有,意思係,種族歧視嘅問題唔會太嚴重,呢個亦係移居外國一個要留意嘅地方。移民去小鎮,多白人,少外地人嘅地方,歧視問題一定比較嚴重,你又難適應別人,而別人係完全唔想適應你。建議初到外國,最好係揀一啲大城市,多種族,文化差異一定有,但住得 City 嘅人習慣面對唔同種族,接受能力同包容度會較高。

呔媽專欄#264|過來人分享,如何適應移民後生活?

所謂物以類聚,響外國嘅香港人自然會聚居某幾個社區,除咗好多新移民會聚居嘅 Chinatown 之外,另外仲有幾個地區係較多香港人居住。多人居住自然有飲食有生活,區內會有港式超市、茶餐廳、中式酒樓、零食精品店,甚至卡拉OK娛樂。近呢10年更貼近潮流,多咗好多台式飲品,珍珠奶茶店、拉麵店、壽司店,如同一個小香港。

呔媽專欄#264|過來人分享,如何適應移民後生活?

由於當年三藩市學校係跟最近居住地區去分派,所以多香港人居住嘅地區,該區學校自然較多港人就讀,學校生活比較容易適應。至於我當年中三移民,入讀美國高中 9 年級,讀到 12 年級高中畢業就可直升大學,教育制度同課程的確比香港容易得多,而一般多香港人嘅學校,校分會較高。

住大城市好處不少,唔止學生移民容易適應,就連大人都唔會太難生存,因為有好多工作就算英文唔太流利嘅人都可以做,例如在華人區嘅銀行、公司、餐廳工作,客人多是華人,多以廣東話或國語溝通,英文就邊做邊學吧!美國有法例保障,至少準時收工準時出糧,加班有補錢,付出同收入成正比,生活自然開心得多。

 

昔日文章:#257 呔媽移民回憶錄

 

 

advertisement