advertisement

呔媽專欄 #265|讓孩子及早學懂照顧自己,照顧別人

教養兩個仔,老公話其中一件一定要教識佢哋嘅事,係兩個仔會主動幫屋企手,做屋企嘢。佢話好怕啲男仔姐手姐腳,少少嘢都做唔好,如果兩個仔第時係咁樣,佢會好忟,哈哈!呢樣嘢,我同老公好有共鳴,響我心目中,男仔係唔可以太斯文,要實淨啲 handful 啲,要畀到人安全感。

 

呢樣老公不嬲做得唔錯,平時有咩屋企嘢要整,會專登叫兩個仔幫手。其實唔易㗎,因為要一邊整嘢啦,一邊教佢哋點整啦,又要忍受佢哋搞亂檔啦,係畀自己一個人完成慢幾倍。自問我冇咁嘅耐性,我係果啲快快手自己做完,你唔好打搞我嘅人,咁樣當然係唔好啦!

 

印象中我細個又係完全唔使做屋企嘢嘅,應該我媽咪都係我呢種,情願自己快快手搞掂嘅人,然後我就只懂吃喝玩樂,真係好大鑊!應該係到讀大學,自己同同學搬出嚟住,先真正開始學做人。洗衫煮飯執屋買日用品,仲要幫手搬嘢,間中砌傢俬咁,開始有能力獨立地生活,慢慢仲識照顧埋其他人。

 

好記得 10 零歲嘅我,去朋友屋企食飯,係完全唔會話主動幫人哋執拾洗碗,我仲衰到覺得,我響屋企都唔使做啦!我媽咪都未敢叫我做嘢,做咩你要辛苦我? 可以衰格到咁㗎喎!呢啲咪冇家教囉!縱出嚟㗎,我響屋企大小姐咁㗎!你話幾大鑊喇!我一諗到呢度,真係打個冷顫,錫還錫,我媽咪縱到我咁係真係好唔啱,人哋見到我咁呀,都會諗到我父母係咪唔識教女啦,就算唔講出口,都擰晒頭覺得我冇家教!好彩之後搬咗出去住,開始識得諗人,學識責任感,如果同屋企住到而家,後果真係不堪設想呀,應該係宇宙級港女!

呔媽專欄 #265|讓孩子及早學懂照顧自己,照顧別人

由於自己細個咁樣,知道個嚴重性,我更加唔想縱兩個仔變廢人,所以一直好努力咁教,身教言教,推動佢哋見到咩都要主動幫手,唔可以懶!一眾溺愛自己小朋友嘅父母,真係要借鏡喇,錫佢反而係要畀多啲責任佢,努力教佢點做人,等佢有求生能力,唔係窩住佢響屋企做大爺當寶。到佢哋要踏出社會,要同人相處,同人合作,出到去畀人一個點樣嘅印象,就係靠我哋平時教導喇!