呔媽專欄#267|家教好壞影響一生

呔媽專欄#267|家教好壞影響一生

前兩日打電話去 IKEA 顧客服務部,因為我哋屋企有幾個早年要 recall 回收嘅衣物櫃桶,話有幼童拉隻櫃落嚟做成家居意外,所以某啲年份嘅呢隻櫃桶可回收及退款,咁啱我哋就正正係果時買嘅。IKEA 2 個月前派車收咗幾個櫃,話會再有人聯絡我退款事宜,但到而家都未有消息,所以打去問下。

 

呔媽專欄#267|家教好壞影響一生

(編輯幻想圖)

聽電話嘅係一個年輕外國男仔,佢知道我情況後,除咗為事件不停道歉 (其實只係好小事,美國唔會有追不到嘅數),仲好有耐性好清晰咁講述成個退款過程係點,當中邊個部門有可能出現咗問題,以致冇人再聯絡我跟進,佢會開個 file 調查。

 

呢個男仔實在畀我太好印象!好少顧客服務會咁細心,樣樣嘢都講清講楚。到處理完件事後,我忍唔住讚佢,做呢個工作好稱職,好有交帶,我好滿意!佢話佢做呢個工作,就係要幫顧客解決問題,佢都希望佢尋求協助時,會得到同樣對待,所以佢將心比己去做。我話同埋你咁有禮貌,咁有家教,你父母教得你好好!佢聽到之後好開心,仲話放工會話畀佢父母聽有人讚佢哋個仔,佢父母聽到一定好感動!

 

因為好少會有人出口讚美,而家呢個年代,唔好話讚美說話,唔樣樣嘢投訴已經好彩!我就同佢講,一定會,因為我都係人哋媽咪,如果有人讚我個仔,我會覺得好有成就感,自己冇白費心機教導。

 

談話中佢亦提及到,呢個世界真係好需要愛,需要互相支持同埋鼓勵,即使係陌生人就如你我。我鼓勵佢欣賞佢,係會令佢更愛自己嘅工作,因為真係幫到人,得到別人認同,佢會做得更好。而佢講到將心比己,其實我哋由細教兩仔最緊要就係呢樣嘢!當你凡事設身處哋,諗下調轉係發生響自己身上,會係咩感覺? 你自然就會多做好事,對人好,態度好,因為人係會想感受愛,會想別人對自己好!講完呢個電話,令我覺得不妨多啲讚賞你欣賞嘅人同事,有時我哋會怕醜,會唔好意思講句讚美嘅說話,但其實一句讚賞,對別人嚟講係好 meaningful。

 

今日開始,大家就多開口啲讚許自己嘅伴侶、小朋友、朋友家人,甚至街上人,讓呢個世界多點正能量!多點愛!

 

 

呔媽 facebook page: 騎呢.weak7.卜車呔

 

 

 

advertisement