呔媽專欄#277|外國生活 VS 香港生活

呔媽專欄#277|外國生活 VS 香港生活

近日網上人氣話題,大多係圍繞香港人移民到英國生活摘要。居英港人 / 家庭接受訪問時,會指出外國生活同香港生活嘅大不同,提醒大家要入鄉隨俗,移民前最好先要了解外國文化以免生活難以適應。一向少接觸英國生活文化嘅我,睇完居英港人提及嘅二三事,覺得幾有趣,英國人慢活嘅態度同美國呢邊好相似,又分享一下生活鎖事。

居英港人提到英國人生活態度十分悠閒,同香港急促生活節奏相反,就連簡單修理家具都要等一星期先來報價,又再等一星期安排修理,每件事都要無限等待。其實美國人亦是如此,無論上街購物排隊,打電話往顧客服務,到銀行入帳,到公司查詢事情,總之要同外國人交手就預咗慢!廿幾年習慣了,自己亦學識體諒外國文化,趕時間嘅就下次先做,唔趕嘅咪等下囉!自己心急,但唔可以打搞別人工作模式,偶爾遇到啲快手快腳又幫到手嘅人,當中咗六合彩咁㗎喇!如果大家有留意外國人嚟香港食澳牛,佢地會將澳牛文化視為香港光速文化,我哋真係慣咗快靚正!

另外有人提到語言文化,初時好難聽得明外國人講英文,縱使自己都有大學文憑。香港人出名識字多,寫文叻,但始終香港少機會講英文,幾叻用字都好,要開口講多少會尷尬,而要聽得明對方流利英語就更加需要一段時間熟習。好記得上大學時,讀設計經常要做 presentation 去講自己個 design 係點樣,入面有咩元素,靈感由來等。面對不同種族嘅同學,由一邊口震一邊講,到最後愈講愈輕鬆,甚至可以解答同學們即場發問,其實都係一個好好嘅訓練過程,特別是練大膽練厚面皮。所謂熟能生巧,其實只要膽大 (講) 心細 (聽) 面皮厚,加埋身體語言,溝通方面絕對冇問題的。

最後再次提醒各位有意移民嘅朋友,我見居英港人有移居小鎮嘅一群,我就唔太熟悉英國小鎮嘅風氣,但來美國的話,我建議選擇大城市,例如紐約,洛杉機,三藩市等眾多種族國籍嘅城市。原因居住大城市嘅外國人比較容易接受他方文化,種族歧視亦相對減少,人與人之間包容度較高,香港人移民到大城市會較容易融入社區,搵工都容易些。

最後,大家無論決定留港或移民,都祝大家生活美滿!身體健康!

想繼續睇我分享生活點滴,可到 facebook page:https://www.facebook.com/curry143/

advertisement