你願意嗎??

如果宣讀誓盟,係男女相方一生一世愛惜對方既,咁決定生一個小朋友,同樣係父母相方對孩子一生一世愛惜既!呢個,並唔需要簽紙發誓,因為當你決定做人父母既一刻,已經附帶著呢個一生既諾言。我覺得,決定做父母,對小朋友既承擔同付出,絕對比責任更重大!你,願意嗎??

 

每日湊住2 個仔既我,經常會被新相識或唔相識既人,問到關於湊仔既事。好奇怪接近100% 既人劈頭第一句就會話: 自已湊好辛苦喎!再談及我地已經好幾年無睇電視劇集,每逢假日出外都會帶住2 個仔,去一D佢地岩玩既地方。對方聽到又會話: 咁慘? 咁好悶架喎!

 

其實我想講,當你決定要小朋友既一刻,應該已經預知到黎緊既生活會係點樣。如果諗住同未有小朋友前既生活係一樣,咁結果只有兩個,一係你痛苦,一係個小朋友痛苦。

 

環顧四周,不難發現好多父母仍然放棄唔到個人生活,兩公婆會為左爭取自己既享樂時間而發生爭執。你又唔想湊我又唔想湊,照顧小朋友就你推我我推你。又或者慢性瘧待,晚飯時間睇埋晒D打打殺殺,家嘈屋閉既電視劇。再來老屈小朋友陪大人長時間行街,小朋友全程機不離手,睇到對眼鬥晒雞。大人痛苦,小朋友其實更難受。

 

唔係話有小朋友就要付出晒所有時間比佢,完全無左自己,需要適當平衡。我想講個重點係,當有左小朋友既時候,生活係有一定轉變。自己心理上亦要作出改變去歡迎呢個小生命,而唔係去覺得佢既存在係一個包袱,令你做唔到自己一向可以做既野,覺得佢煩,阻手阻腳。而當你接受左呢個改變,願意以小朋友快樂為首,其實所有野都會變成享受!小朋友既幸福,在於父母比佢地既愛同關注有幾多。

 

我享受每日睇住兩隻野成長,享受每朝起身見到兩塊傻豬臉,佢地快樂,我更快樂!縱使全職湊佢地有辛苦忙碌既時候,但更多既係佢地比我好多開心既時光。由今日開始,試下放低自己,多D 享受同仔女一齊既時光,成長錯過左,就追唔返架喇!

 

P1500713 - Shortcut copy