呔仔語言治療(一)

間唔中都有卜友問開呔仔而家講野點,等我響度update下佢呢方面既近況,順便亦同各位媽媽傾下呢個問題~

 

呔仔大約2歲左右開始講野,都係一般既BB話,我地無咩特別留意佢上既問題。其實一直都有上載呔細D片去Youtube (TylerTheBaby)。期間都有好心卜友提醒我地覺得呔仔講野唔正,可能要注意同佢訓練下~ 其實呢樣野係十分之「當局者迷」﹐哈~ 因為日日對住佢既關係,我地2個係好明白佢講咩,自然唔覺得個問題係咁嚴重,當我而家睇返佢細個時D片,真係完全聽唔到佢講咩咁滯,因為佢講野唔清楚之餘,仲差不多成句唔岩音~

 

例如「天空上面有直昇機」 會變左「堅空Keung面有極經機」。

係直至佢3歲左右,真係愈黎愈多人(唔係成日見既朋友)聽唔明佢講野,要我地翻譯。呢樣野開始影響到佢同人溝通能力,咁我就開始正視呢個問題喇~

 

我覺得小朋友每方面發展都唔同,其實我一直並無太過擔心呢樣野既。一來知道問題在雙語小朋友黎講係好普遍 (我地響屋企係講中文﹐而佢平時睇電視同返學都係講英文)。二來我發現佢好多音係中文發唔到,但英文又發到喎,例如小火車Thomas,佢發得好清楚最尾S音。但講中文既時候佢所有S音會變成G音,例如沙就會變左加~

 

問過醫生佢又話唔係痴脷筋。如果痴住條脷唔會伸到咁長﹐或者條脷會變左W咁樣中間扯住左。加上呢邊唔興剪脷筋,佢話其實剪左無咩幫助﹐好多人真係痴既就算唔剪慢慢都會講到正常。

當時係揾左兒科醫生refer去專科,響Hearing and Speech Center做左個評估,發現原來佢既問題都幾難攪下。又好彩喎,比我地約到個識講中文既師,否則好難幫到呔仔。原來佢話呔仔既問題並唔常見,佢呢種叫「Backing」﹐即係時條脷縮向後,唔識頂出黎。因此佢大部份都係用 G,K呢D後舌音,發唔到T,L,D呢類前舌音。而點解難攪呢,係因為常見既問題較易處理,例如「公公」變左「東東」呢種,就只要用雪條棍頂返佢條脷入去已經講到。但呔仔剛相反,點樣可以拉返佢條脷出黎呢? 呢個就真係要花時間改善。

 

下篇我會繼續講下治療師點樣幫助呔仔改善~

 

呔仔第一堂既情況 ^^

 

kelly