「父能量」vs「負能量」

雖則話我好想有多啲時間陪住自己嘅仔女。

 

但係,有啲時候陪住佢地時,又唔係想像中咁輕鬆愉快。

 

耐唔耐都會喺自面書留低以下嘅感受:

 

陪住兩隻小鬼,有唔少開心樂事....

不過,其實勞氣嘅時間都好多...

你想佢地做A,有時會叫極都唔做、有時會扮聽唔到、有時會好唔情願咁做、有時會堅持做B、有時會明明講好左玩完就做A,但玩完之後唔認數、有時...

總之,就係情緒、EQ、耐性、智慧....嘅大挑戰大磨煉!

各位爸媽朋友,一齊繼續努力!

 

照顧仔女時,最辛苦嘅野,原來並唔係仔女扭計或唔聽話,而係自己嘅狀態唔好。可能係自己好累、可能係好多野擔心緊、可能係有一段長時間無放鬆過處於壓力中...。當自己呢啲狀態,平常對住仔女嘅愛心、耐性...全部無晒。係充滿「負能量」嘅狀態,投入唔到同佢地一齊、心不在焉、仲會特別容易俾佢地激親、特別容易扯火 🙁

 

我覺得,若想做一個對仔女有正面影響的,真的需要習慣時時刻刻反省、檢視自己的狀態。

當發現自己對住仔女好忟憎時,以我嘅經驗,通常都可反映出自己的狀態唔好。為免將自己的脾氣情緒唔覺意發洩俾仔女,就需要停一停,諗一諗:究竟自己發生緊乜野事、有乜問題、要點樣調整自己?點樣提升自己正面嘅「父能量」。

 

「負能量」與「父能量」,有時只是一線之差。

 

我調整自己嘅方法:

 

早啲休息,透足精神;訓一覺後,精神爽利,通常心情/情緒會好番啲;

 

  • 做運動:我會選擇跑步,在寧靜的跑步過程中,煩惱/擔心等負面情緒通常都可以隨著汗水一併發洩出來;

 

  • 食comfort food:食啲好野獎勵自己;對於我,靜靜地食一杯$5的冧酒提子雪糕已經好有治療作用;

 

  • 搵人傾下,透過分享交流,可以更加清楚自己煩緊乜、擔心緊乜。

 

生活雖然充滿壓力同挑戰,但經適當調整後,我想,定能讓自己更有力量更投入咁去照顧陪伴仔女呀!

papa

 

[相片CAPTION:兩隻小鬼遲仔同齊齊整在扮師拎住機四圍拍攝,玩得好開心,我亦能好投入咁同佢地一齊玩。當調整好自己,就能較投入與仔女相處,享受相處的時光。]