呔仔語言治療(三)

繼續講呔仔學發音既情況~

 
治療既期間,除左每星期1小時去center做練習,每日我都要同呔仔響屋企面對面坐練習,包括吹唔同Level既笛,咀唇含木棍(漸於兩端加重量),用大牙咬膠條,伸脷向上下左右加打圈,練發音等。
由開頭練ma ba pa去練咀部肌肉,到肌肉強化左之後練da ta la去練舌頭擺位,到s/sh音有改善(e.g. 講食唔係極),到之後練有t/ d/ l音既中文字 (e.g. 圖書、冬天、暫停) 每個轉變,每次佢發到某個佢從來發唔到既音,我都好激動呀﹗真係眼濕濕架﹗

 
最記得係有一晚,果時都過左3個幾月,2013年頭架喇。佢同我講 「媽咪我想食糖呀!」 我呆左,唔知點解好想喊… 你知唔知﹐佢一直係話 「極講」,到後期好D講到 「食講」﹐我真係等左呢句「食糖」好耐喇…嗚... (係,我本人認為「食糖」對小朋係黎講好重要 xD)

 
由於佢呢幾個月來都有好大既改善,大約2013年1月左右就治療完畢了﹗由2012年9月開始,總共上左15堂(小時)左右。而家佢發音都8、9成正確,係某D音仲差少少,同埋講野好hea囉﹗唔知係咪雙語關係,講中文D音好似講英文咁﹗ABC仔通病,要慢慢同佢執~

 


我發覺整個治療其實係著重於訓練佢咀部,舌頭肌肉,發音既咀形,最後先係學發音。又好得意喎,當訓練肌肉之後,其實係自然地會發到某D音。換句說話講,我地平時發現小朋友講野唔岩音,猛叫佢跟我地講 (e.g. 唔係巴﹐係花﹗)其實唔需要架,因佢只會不停重覆錯果個音。而我地就可以講多D正確既音比佢聽,但又唔好話佢錯喎~ 發唔到係咀部肌肉問題,所以一時三刻唔會即刻講到,要比時間慢慢練習,真係唔急得。

 
諗返起呢個仔都真係算合作﹗得果4歲,耐性一定唔多架喇﹗日日比人捉去坐,完全無反抗,叫佢做咩就做咩,講咩就講咩。由於日日重覆,佢都習慣晒,一叫佢練野就自動埋位,哈~

 
而我自己感覺真係特別良好架﹗日日練,幾悶先得架,我坐唔定架嘛﹗真係自己讀書都無咁勤力@@ 不過媽媽就係有呢種神奇既力量,只要係幫到個仔既,一定赴湯蹈火,少少耐性又算得係咩丫。不過D野真係唔好諗返轉頭,我次次諗起以前點湊佢地,都幾驚嘆,點解果時可以咁鐵人架呢? 果種湊BB既非人生活,真係諗起都驚驚地﹗Xddd

 

Kelly_1

 

 

較後期既功課

Kelly_2