呔仔語言治療(二)

上回講到治療師發現呔仔既情況都幾難攪。聽到果刻都有D受難又有D 眼濕濕。

見到呔仔咁天真,佢都唔知自己有問題,有時朋友同佢傾計會扮佢講野,我知無惡意,但都幾唔開心。驚hurt到呔仔嘛,怕佢以為人地笑佢。又或者當佢猛咁重覆,人地都聽唔明,我又會好緊張佢既反應。

好彩一直以來佢都係開心仔,唔會對呢D事敏感,所以都無試過因此而受打擊。佢有問點解要去學講野,我同佢講,好多小朋友咁細個都唔正,都需要去學,學左講野叻好多架~ 媽咪細個都有學架 ?(係呀響佢心目中我做咩都係好架嘛!佢聽完好似放心左,仲話 「哦~ 原來你都有學架咩?」)

不過好快我既難受感就無左,因為每次去做治療,center入面都有好多唔同情況既小朋友,有D戴助聽器,有D過渡活躍咁,都係一D 有問題既小朋友。見到佢地同佢地既爸媽,其實好心up,佢地湊小朋友既路真係唔易行。心諗呔仔呢D小問題又算得係咩? 自已經係好幸運既一群了。
當時係2012年9月左右,呔仔3歲9個月剛開始返學。治療師就安排呔仔逢星期4放學去練習1小時,佢會設計一套適合呔仔情況既治療計劃比佢。除左每星期1小時佢幫呔仔既練習外,我亦要每日響屋企同呔仔練習,佢先會容易改善。
記得治療師講過,如果平時佢唔準,唔好捉住個字黎教或者叫佢跟我地講。因為佢真係未講到,猛叫佢講反而驚佢怕自己講錯而唔肯講。但我地可以清楚地重覆佢講錯既句字。例如佢話 「媽咪我想計健kee呀」 我地就可以講返岩比佢聽 「你想睇咩電視呀? 睇Fireman Sam電視好無呀?」之類可以重覆正確既回應。

好喇,開始練習~
治療師響初期比左幾樣野呔仔做。包括吹泡泡、吹笛、含扁木棍。呢幾樣野係訓練佢Lip Closure,因為發現呔仔唔識用唇力,對有影響。好似佢吹泡泡唔識豬咀「呼」出去,佢係扁咀向下「呼」果種,仲要無氣,所以要訓練。
而「吹笛」亦係治療過程既一個重要環節,因為笛係有唔同level,吹掂左一種就上第二種,所以笛/口琴等係由頭吹到尾~ 哈~ 而笛唔係好似平時玩咁吹喎。

吹笛既方式,係我同呔仔面對面坐直,我渣住支笛比佢吹一下,就拎返出黎,要一下一下咁吹。而治療師只要求佢每日吹到2次靚聲,即係聽起黎好聽,無漏氣無走音無高音,唔准咬只可用咀唇夾。不過呢個「靚聲」我話你知真係吹來不易呀!我地平常只要隨便吹,但呔仔練習好耐先可以吹得1次好聽咋!

此事我又領悟到人生,幸福真係唔係必然,我地隨手可得既條件,可能別人要多花幾倍努力都未必一定得到。真係要感激同珍惜自己擁有既野~
(下篇繼續!仲有排講 ^^)
我與呔仔的功課
kelly_2 kelly_1