無辜的細細

出左上幾篇講呔仔既發音問題後﹐響微博(@)就即刻有Blog友問起細細﹐想知佢而家講野講成點。其實係好感動﹐我班卜友對佢2隻野好鬼上心﹐平時留意到佢地好細微既野﹐同埋好耐之前既事都記得好清楚架喎﹗感動感動~

 

好喇點解問起細細呢? 係其實一開始細細講野發音係好清楚既﹐但發現佢慢慢竟然跟左哥哥﹐講野真係完全一樣呀﹗D發音完全同呔仔一樣錯響後舌音﹗無辦法﹐佢日日對住哥哥﹐2個又勁鐘意吹水﹐基本上佢所有野都係跟哥哥學返黎咁滯﹐哈~ 因此佢就由原本講野講得好清楚﹐變左同呔仔一樣講到一舊舊﹐真係無辜辜喇~

 

有問過治療師姐姐﹐細細咁樣使唔使做治療? 佢話如果佢本身唔係咁﹐只係學左哥哥﹐咁就無問題﹐慢慢都會講得返正確。因為父母發音都無問題﹐如果佢只係模仿就唔需要擔心。而且佢先3歲﹐仲要係男仔(男仔一般發音進度較遲﹐好多音4歲後先講到)﹐都係等佢自然成長~

 

其實呔仔果時咁嚴重我都無點擔心既﹐所以細細黎講更加由佢自由發揮。加上細細係比較主動去訓練自己既人﹐佢都好肯學講﹐所以佢會突然講到某D音。都幾驚喜架﹗又得意喎﹗我發現呔仔明顯改善後﹐細細又真係自然地發音清楚好多喎﹗起碼唔熟既朋友都聽得明佢2個講咩﹐我就由佢地慢慢進步啦 ^^

 

有福同享﹐有音同錯﹐果然好兄弟﹗XD

 

1