童心看世界

有小朋友真係一件好快樂既事呀!

 

之前10年8載唔知點解咁快過左去,又唔知點樣自己由一個少女霎眼變左2子之母。可能就係因為咁,其實我覺得自己都仲係個大細路。但亦因為咁,我同呔細溝通得好好,暫時思想好接近(我認我幼稚XD),更多時候係佢兩個勸返我轉頭(多數係我狂嗲佢兩個時) 「媽咪,你唔好咁樣啦~」 哈哈~

 

做大人,其實真係幾無癮。30年來,每樣野每件事都由原本開始,慢慢一個框一個框咁加上去,愈加就愈複雜。對每件事既睇法同反應,都已經有一個標準模式。響條街有人問你借廿蚊搭車,你又會諗佢係咪呃我架? 因為我地既人生經歷,親身又或者聽聞,都令我地已經唔會好單純咁去睇每件事。如果呢件事發生響呔細身上,我相信佢地睇到既係:借廿蚊搭車呀?呢個叔叔真係可憐喇,無錢搭車返屋企揾佢媽咪喇~

 

回心一諗,其實可能佢地諗既先係事實喎!

自從有左佢2個,我覺得自己簡單左(本身已經簡單,而家接近居XD) 佢地對事物單純既思想,令我覺得好舒服。老土D講句真係有如初春既朝露 (wakaka 咩料呀?!) 有好多時候我係比佢地做既野所感動,覺得佢地既世界好美好,從佢地眼中睇咩都係咁靚,好戥佢地開心~

 

好似早幾日,呔仔完成左一份Lego。有拯救船、直昇機、燈塔、快艇等。然後佢鐘意自己作一個故事,就會叫我拎住隻船呀直昇機呀之類,跟佢講既故事情節陪佢一齊玩。

 

1

 

佢講講下,就話有2條鯊魚衝燈塔果度咬果2個人喎!

 

咁自然我就要出動直昇機去驅趕同埋射水炮擊退鯊魚,然後救返果2個人啦~

 

比鯊魚咬,呔仔真係7情上面架喎!

 

2

 

之後我帶鯊魚走啦,諗住話咬唔到人咪游返落海囉,跟住呔仔拎住潛水艇仔嗌住我,叫我唔好走喎!

 

我心諗,佢梗係想追住我黎「蕉蕉蕉~」啦!

 

我都差D「兇」返佢,諗住嚇一嚇佢之後就成機逃走架喇!(好彩無咋,否則做左個壞榜樣@@)

 

點知佢話「鯊魚呀你知唔知你咬人係唔岩架,佢地會好驚架!你下次唔好喇,如果唔係警察會拉你坐監架!知唔知錯呀? 」

 

 

仲要把聲係循循善誘果隻喎!

 

聽到佢咁耐心教好壞人,我幾感動呀!好欣賞呀!

 

3

 

 

 

 

4

 

唉呀!諗起將來有一日,呔細長大了,都會同我一樣思想隨年月變得不再似小朋友一樣單純,真係有D感慨~

 

希望佢地長大以後都可以keep住呢個善良既心去看世界啦 ^^