advertisement

夜晚放工返到屋企,見兩隻小鬼仲未瞓,就入房陪佢地瞓覺。

 

我一入到房,囡囡齊齊就不斷同我講野。

 

齊:爸爸,你錫唔錫我呀?

 

我:錫呀。

 

齊:你錫唔錫哥哥同媽媽呀?

 

我:錫呀。

 

齊:咁你錫唔錫自己呀?

 

我:...(估唔到佢會咁樣問我,突然間唔知點樣回答)

 

齊:爸爸,你唔錫自己,就唔識得錫其他人架啦...

 

唔知點解一個只有四歲0既小朋友會識得講呢0的咁有智慧0既說話。不過,真係「小朋友大智慧」,齊齊呢番說話,真係好大0既提醒。

 

做左爸爸六年幾,一直都將仔女放0係首位,事事以仔女之考慮為先。逐漸地,變得越來越無左自己...。為左仔女而犧牲左休息時間、興趣娛樂、與家人朋友相聚0既時間、兩家婆拍拖溫馨0既時間...。原來逐漸變得無乜機會去顧下自己...

 

諗深一層,一個經常唔係幾夠休息、無乜機會放鬆休閒釋放壓力、好少機會同人溝通接觸0既爸爸,又點會有力量去愛護照顧子女呢?

 

齊齊講得啱,要錫身邊0既人,就先要錫錫自己!

 

各位爸打,你今日錫左自己未呀?

 

 

(要孭起妻兒子女...,要先好好愛錫自己!)

 

chiba_photo