如何調解呔細爭野?

前2日響微博(@呔媽)有卜友問左一個好好既問題,就係問當2個一齊坐BB車時,呔仔有無爭坐前面架(因呔仔係一直坐後面)? 如果呔仔細細都爭坐前面時,我又會點樣解決呢?

 

呢樣野引伸左一個好大而又好重要既討論題目,就係當佢地爭野既時候,我點樣處理?

 

首先想講既係,我都係新手媽媽,都係邊湊邊,所以我既方法未必一定係最好或者正確。但有人問開又不妨大家討論下,始終每個小朋友性格唔同,自己先最清楚自己仔女可以用咩方法黎教^^

 

其實我經常都處理佢地爭野既問題,2個仔差唔多年紀,堅爭又好趁墟又好,爭野係難免的!但我個人思想比較古怪,我唔鐘意D好多人都鐘意既野。所以好自然我排解此等紛爭既方法,都會用左我自己一套想法去解釋比佢地聽,等佢地明白爭到返黎既野,未必係最好。而我既角色,就係引導佢地發掘「一般人覺得唔好既野」既好處喇~

自己心態好重要!身教亦好重要!平時唔好灌輸咁多「咩都要最好最靚」既心態。每事欣賞,比小朋友知道,其實擁有已經好幸福,唔需要最好,只要好好享受自己有既野就係快樂!
好!講返爭坐BB車~ 印象中呔仔都有話過想坐前面,但我同佢講,高既小朋友先可以坐後面,佢腳長所以可以坐(讚賞﹗) 而且坐後面,前面有人擋住,幾安全先得架!又近媽咪喎,有咩事媽咪即刻攬住你嘛!同埋最正係前面有個小網袋可以載車仔玩具,隨時拎出黎玩(多樣好處﹗) 呔仔聽完即刻以後都坐後面啦~ 哈哈~

 

(不過唔好比細細聽到喎﹗唔係變左2個爭坐後面架喇~)

 

如果係平時一般爭野,無咩道理可言既話,就出我地經常用既「轉移視線」喇!因為一般黎講,小朋友爭野都係為爭而爭,爭完好快又會放低,所以唔值得同佢地嘥咁多口水 XD 方法有好多,媽咪陪玩陪畫畫啦,2個會爭住放低樣野,「比你啦﹗你要啦﹗」 變左爭住跟我走~

 

如果唔得閒陪玩,零食亦都係好幫手, Yogart呀百力支呀蝦餅之類,佢地一聽到都會即刻停,衝左入廚房~ (好彩佢地為食,特別是呔仔,永遠第1個放手XD)

 

如果以上都唔work既,又真真真……係處理唔到,最後就係罰!大家都無得攞果樣野之餘,再加罰企!咁至少我地可以耳根清淨一輪,等佢地冷靜落黎,再慢慢解釋~

 

我相信爭野都係一個時期,會過去既,期待明天會更好啦﹗^^

 

1

 

 

 

2

 

 

 

3

 

 

4