性格大比拼

如果唔係有2個小朋友,我未必知道每個小朋友,真係有佢自己一個~ 聽就聽得多,個個小朋友都唔同,但原來同一個肚生出黎,同一個環境長大,同一套教育方法,2個仔既可以咁唔同~

 

呔仔就由細到大都痴身、慢熱、膽小怕事、缺安全感、行事小心、危機感強、粗枝大葉、固執﹐但好可靠、熱心助人、為人正直、極富正義感、同情心、感性、本性善良~

 

細細就比較獨立、熱情、十分細心、勁識冧女(即係我)、醒目、熱心助人、正義感強、同情心、保護家人﹐但不顧安全、危機感弱、無尾飛陀、古惑、大膽(表面上)、愛面子、易喊~

 

就咁睇落去,係咪2個D完全相反呢~

 

其實之前有排細細都難攪架,唔知係咪Trouble 2,真係咩都玩對抗。好彩有哥哥領導住佢,先慢慢變返好咋﹗我成日都好感激呔仔,我覺得佢做哥哥做得好稱職﹗好多好既,例如正義啦,熱心助人啦,有同情心,善良呢D,我覺得細細係跟佢學返黎~ 睇到哥哥對事物既反應同感受,細細又自然會跟住學。

 

以細細比較反叛同自主既﹐其實佢好容易受人影響學壞,加上佢有少少打交底,如果唔推佢去警惡懲奸,比個責任佢保護家人,佢好容易就會變左壞人,哈~ (所以我響屋企既角色要成日比壞人捉呀,比Monster扯走呀,咁佢2個就會擔當救人既角色,伸張正義﹗) 有哥哥跟,有個好榜樣,而家佢地都做左Hero同警察,立志對付壞人﹗Yeah!!

 

發現左一樣野都幾得意,就係朋友同佢地2個既相處既感覺。初相識,一定係傾向細細,因為細細熱情肯跟人,而且好快就會同你玩到癲,再加埋佢D 冧女陰陰咀笑(仔都唔放過架﹗) 攬頭攬頸,多數D friend都會死響佢手上,哈~而呔仔就相反喇,由於慢熱,同埋好鐘意喱埋響我後面,我推佢出去佢會扭計。最多禮貌上叫你一聲,所以一開始係無人埋到佢身﹗

 

但其實我反而幾buy佢呢個~ 即係我覺得我對住陌生人唔舒服既,我唔一定要表現熱情。最緊要佢又唔會介意人地唔同佢玩,佢根本都唔鐘意同唔識既人玩。我覺得呢D係,唔需要話推佢出去要點social,佢只係做佢自己認為舒服既野。當然﹐我會要求基本禮貌,叫人同應人~

 

 

講到呢度,唔好以為呔仔就蝕章喎﹗當我D 朋友同佢混熟左,佢肯跟你同你玩,哇﹗勁多野講,又攪笑﹗好多你意想不到既天真善良,真係可以令你覺得好窩心,世界真是太美好了﹗哈~ D朋友就開始講﹐發現呔仔內在真係好得人鐘意,一開始佢慢熱,但見多幾次慢慢熟左之後,真係會好錫佢~ haha~ 所以話好多野都唔可以睇表面﹗至於細細,你都會一樣咁錫佢,會遷就佢既任性,因為一開始你已經比佢迷惑左架喇﹗所以佢做咩你都唔捨得責怪佢 (偷笑)

 

有時會諗,唔知佢地而家既,會唔會隨住慢慢長大而改變呢? 而我可以做到既係,希望比到佢地一個快樂既童年,可以抵擋多D外來壞因素,長大後思想一樣正面,保持純真善良既~

 

慢熱善良的呔仔

 

1

 

熱情細心的細細

 

2