他的志願:倒垃圾

相信唔少人細細個就被灌輸「唔努力讀書大個就無用﹗」而一眾好努力咁工作緊既清道夫﹐多數會被「就地取材」做左一個活生生既教仔例子。唔知點解好地地﹐正正經經做一份工﹐自給自足﹐付出勞力有糧出﹐反而會變左一個壞榜樣架呢? 好可笑吧?

 

點解對一個人既評價﹐唔係取決於佢人格或者言談舉止有否修養﹐而係表面地睇佢做咩職業或者貧富與否呢?

 

我覺得小朋友要學識尊重別人﹐呢樣係好重要﹗因為只有懂得尊重別人既人﹐先會被人尊重。同時亦都必需教佢地尊重每個行業﹐每個努力工作既人都係有用既人﹗

 

其實小朋友既「小時候」真係好重要﹐好需要大人灌輸正確價值觀。因為佢未識自己分析對錯﹐覺得大人講既野就一定係岩。唔好以為佢得幾歲唔識野喎﹗好多野大人講過﹐真係會記一世﹐好多教誨亦會成為左佢一直成長既左右銘。

 

我自己有一個小例子: 話說小二左右﹐某次默書無溫考天才﹐衰左﹐一個姓黎既女﹐就當住成班同學面前大聲鬧我「你唔努力讀書呀﹐大個左你等住響屋企湊仔﹗﹗」你諗下我記到而家喎佢呢句野﹗你話D大人呀呀﹐講既野對小朋友影響幾深遠呢~ 由果時開始﹐我心入面就覺得﹐所有湊仔既師奶一定係細個唔努力讀書﹐咩都唔識架喇﹗拿﹗咁咪錯晒囉~

 

 

佢咁講就唔岩喇﹗我夠大學畢業啦﹐都係響屋企湊仔喎﹗好明顯佢自己唔係響屋企湊仔既人﹐就間接話班湊仔婆無用囉﹗可能覺得做教書既勁過響屋企湊仔掛? 點解佢又唔諗下﹐湊仔婆背後對仔女付出既心機時間耐性﹐對仔女既愛係要大到日日對足佢地24小時喎﹗好偉大架呢個職業﹐並唔係一般人可以頂得順~

 

教仔有時係會有矛盾位﹐無錯你未必想佢大個去做清道夫﹐但都唔好話人讀書唔成無用嘛﹗可能人地大學畢業揾唔到工呢﹐有份正職總好過hea響屋企打機掛? 換個方式盡量教佢地欣賞別人既付出﹐一個社會係要靠唔同職業去運行既。

 

好似每年生日﹐老公都會問呔仔佢第時大個想做咩職業﹐想睇佢每年對自己既夢想有咩變化。上年呔仔話想做消防救護員(果期睇得“火速救兵”多^^)﹐今年話想做倒垃圾人員﹐因為想幫人倒垃圾﹐同埋部垃圾車好勁喎﹗我覺得好好喎﹗佢有自己既夢想﹐想做自己鐘意既野。老公聽到佢咁講﹐我以為佢可能會引導呔仔去做其他工作﹐但佢無﹐反而教呔仔做野既時候要戴手套同著工服保護自己﹐因為D垃圾比較污糟﹐保護好自己就安全好多可以放心工作喇~ 我聽見﹐幾感動﹐覺得老公好好﹐做左個正面既榜樣比個仔睇﹐同時亦教識呔仔返工時要安全地保護自己~ ^^
20131112_134909

 

20131112_134929