小孩不需起跑線

用「起跑線」黎做商業賣點既人﹐應該已經賺唔少錢﹐同時亦都害死唔少人。一陣「起跑線」吹過黎﹐大家都好驚自己個仔女「輸在起跑線”。結果逼到自己同D仔女入絕路﹐快樂童年無左喇﹐換來既就係不停學習再學習。每年返香港都會買野比朋友D仔女﹐今年佢個仔升左小一﹐佢話唔使買玩具喇﹐根本無時間玩﹐不如買文具比佢仲有用。哇﹗6歲﹗發生咩事呀? 做咩迫班細路跑? 成世人流流長﹐跑咁快做咩呀??

 

事實上新聞日日有﹐呢個「喪跑教制」已經害死左好多人﹐亦唔難發現好多人響水深火熱之中﹐就算未死都果頭近架喇。但點解局完全無伸出援手﹐控制下個場面架呢? 其實一句:收生唔收証書﹗已經可以救返好多無辜既細路仔架喇﹗童年得一個﹐放條生路比人行下啦﹗

 

我必須承認﹐身在外國既我同2個仔﹐係幸運既一群。所以我亦好希望﹐香港既制度可以去參考下呢邊既學習方式:寓學習於遊戲﹗

 

呢邊政府规定5歲小朋友要開始返學﹐果班叫Kindergarten﹐之後就已經上1st Grade﹐即係香港既小一。K班會開始學習A-Z大小字母,數字﹐形狀等。K班之前果2年叫Pre-school﹐選擇性的﹐不過多數人(特別是亞洲人)都會比仔女返﹐想比佢地學習下群體生活。而我比佢地返既想法﹐係因為我地屋企全中文﹐我怕佢地5歲先入K既話﹐一下子全英文會好難適應。而好多外國人都唔返﹐自己響屋企home teaching可慳錢。因為Pre-K唔係政府要求﹐所以唔係免費

 

 

我成日都會留響學校睇仔上堂﹐有活動就幫手帶下細路之類。發現老師上堂教既﹐並唔係書本上既野﹐而係日常生活應用知識。當然都有學習時候﹐每星期學一個英文字母﹐數字﹐另外有國語堂同音樂堂﹐每日大約30-45分鐘係學習時間﹐學習以遊戲形式﹐又或者做勞作﹐其他時間都係玩。

 

呔仔上年3歲9個月開始返學﹐玩得好開心亦學到好多野。今年9月升左班﹐每星期有4張工作紙﹐兩張大小字母﹐一張數字﹐一張油顏色。通常佢10分鐘做完﹐我都唔使睇佢^^ 老師改功課﹐其實唔會睇佢寫成點﹐有無做錯﹐所有功課都有Good Job印仔。因為呢個階段﹐係想佢地養成一個做功課既習慣﹐知道呢個世界有樣野叫做「功課」。

 

過左一年﹐發現呢個制度好好﹐知識係從玩遊戲中學習。而最重要既係﹐小朋友經常得到鼓勵同成功感﹐身心成長十分健康。其實小朋友根本唔需要起跑線。每個小朋友性格唔同﹐唔係人人鐘意同人爭同人鬥快。我明白人在江湖有時真係身不由己﹐但做父母既真係試下放慢腳步﹐停一停諗一諗﹐其實自己小朋友最需要既﹐並唔係一張張証書﹐而只係爸爸媽媽陪佢去玩既一個開心回憶^^

 

細細在班中砌圖﹐砌完好開心猛叫我睇~

 

1

 

2

 

今個星期學英文字母I﹐呔仔班整Ice cream ^^

 

3

 

 

8卦細細路過﹐Ms Sarah比佢攪埋一份﹐haha~

 

4

 

 

到呔仔攪whipped cream~

 

5

 

 

落埋士多啤梨﹐用自動冷凍機攪半個鐘雪佢一晚﹐聽日lunch做甜品﹗正呀﹗﹗

 

6