我衰好喇!

唔知大家睇到呢個標題時,估唔估到呢篇文章係講咩架呢? 哈哈!

 

上一篇文章講到‘窮養仔富養女’呢個話題。當然,凡事有2面,富養女唔多唔少都會被縱出問題來。我就正正係‘富養女’既反面教材。特別是少年時,真係幾難攪,野蠻又任性!而家叫好正常架喇,特別是有小朋友後,更加係要嚴以律己!你知啦,其身不正既話,真係點教都無用。

 

好似琴晚我煮飯時整跌左老公深愛既盆栽,跌到成地泥沙。盆野已經比我撞跌過幾次架喇!成日擺響度阻手阻腳,明陰我啦!我咪話佢囉!我老公幾忍得呀,硬食唔出聲,自己清理返算數,完美示範「好男不與女鬥同「退一步海闊天空兩大人生道理。

 

嗱!我呢D咪唔啱囉,明明自己唔小心,又賴左落人地度,仲要大大聲聲架喎!Hahaha 我無講出口,其實知佢就我,個心好甜既(佢就...) 有見及此,我當然唔可以比呔細學埋我D衰野啦!正所謂‘我衰好喇!小朋友係無辜架!’因此我更加唔會好似我媽咪咁縱佢地,嘩!第時變左我咁咪大劑!

 

結果呢,今日發生左件事,我覺得一定要好好呔仔細細。

 

話說下午帶呔仔細細過隔離球場踩單車,由於上次同婆婆一齊去時,佢2個響一個小斜坡跌過幾次。今次去到,我就同佢地講,唔可以再衝果個斜坡,因為危險,佢地仲未可以控制到。點知當我dup低頭幫細細著返岩對鞋之際,呔仔就炒左斜坡喇!知衰啦,自己行上黎話炒左,摸住個下巴。原來擦損左少少同埋咬親少少條利,檢查過無事就繼續踩。

 

返到屋企婆婆黎左,知道呔仔衝斜坡整親,竟然唔係怪責呔仔唔聽媽媽話,而係怪責我無睇實佢,比佢衝斜坡喎!(唔怪得之我咁啦唉!)第1,事前我已經講左唔可以衝斜坡。第2,即使我在場,都無可能每分每秒望實佢,而且佢唔係2歲,己經5歲半了。第3,小朋友唔聽話,唔聽大人既忠告,咁佢就要承受後果,受傷係一個教訓。點解會變左係媽咪無睇實佢,變左係人地既錯呢? 婆婆此舉令我諗起,我一直好反感有D大人好鐘意當小朋友跌到撞到時,就教佢地打幅牆或者dum地下,話幅牆衰,撞到佢地。又或者打整親小朋友既物件出氣。可能大人係講笑,但小朋友就會覺得係人地錯,唔會諗係自己唔小心。呢個觀念一建立左,以後做錯野唔會檢討自己,會諗係人地唔岩先。呢個關乎於人格建立,我覺得有必要出聲,要教返呔仔細細正確思維,結果就同婆婆爭執左兩句。

 

我地從來唔響小朋友面前爭執,但好似呢D情況,我唔出聲教既話,呔仔細細會覺得婆婆講得岩,就變左是非不分囉。所以話,有老人家響度,教仔真係有難度!

 

我一定會努力教好你地架!真係..我衰好喇!哈!

 

1