窮養仔富養女

自從自己有左2個仔之後,開始對人家講既「仔要窮養,女要富養」感興趣,亦都開始留意身邊一眾朋友係點樣被養出黎,從而又睇下佢地家陣變左咩人,哈哈!

 

依我自己暗中研究得出既結論,發現,確實係非常之有道理的!所謂窮養富養,唔係指屋企環境富貧,而係教小朋友既方式,灌輸比佢地既人生價值觀。例如屋企環境唔錯,阿仔16歲考牌其實可以買新車,但會買2手,仲要佢自己負責一半錢。好多野係自己點去安排,唔使真係窮到loan,而屋企亦未必需要好有錢既,最重要係爸媽痛錫,當寶咁湊!

 

10152424_651580461589730_7966848902333709321_n

圖片來源:互聯網

 

首先講講:

 

我覺得男仔一定要有承擔,正所謂天跌落黎佢都要撐得住!而呢個承擔係必須經過長時間鍛練出黎,先會習慣出果種責任心同鬥心。一個窮小子,佢會諗辦法點樣生存,點樣可以用自己力量去做到一件事,去得到自己想要既野。無人比丫嘛,咪食自己囉!

 

久而久之,佢會變成一個有承擔既男人,有能力照顧自己同身邊既人,亦好識得解決問題。因為細細個已經出黎搵錢,見得人多,吹得水多,做人做事自然圓滑。加上小時候既玩意一般係玩人同比人玩,又或者一齊諗野玩,所以呢類人一段轉數快,性格比較幽默,講野又特別好笑!

1545775_651224461625330_2213704466400827751_n

圖片來源:互聯網

 

至於:

 

我自己無囡,所以我無研究應該點養。係前排睇左一套電視劇叫「蝸居」,其中講到年輕女主角出身鄉村,去到大城市後本有一要好男友,齊齊打工,唔富有但二人甜蜜恩愛。可惜就係未見過世面無享受過,面對引誘時,好容易就比金錢物質蓋過理性,做左人情婦,得唔到好既結果。

當中有段係講個女仔既媽媽,睇到個女咁墮落,好自責自己無能力比好既生活個女,令佢面對引誘時抵受唔住。因為窮,渴望有錢既生活時,就好容易行差踏錯!

 

除左呢個原因,我亦發現另一樣好得意既野。就係既男友/老公,係特別錫佢架喎!點解呢? 因為呢個女仔由細到大都慣有爸媽痛錫,擇偶標準自然高D啦。即係我爸媽從來唔會糟質我既,我又點會肯受男朋友氣呢? 我覺得呢個唔關港女定公主病事,而係一個標準。當你同一個人拍拖,佢錫唔錫你,你好容易會知道,而呢個標準就係細到大建立返黎。

 

人生嘛!當然有好多例外,無野係一定既。

 

我只係將自己既想法同大家分享下,大家又討論下咁啦 ^^