尋找小孩的自信

我相信每個人,與生俱來就有屬於自己既專長。只係好多時未有機會接觸到,就唔知自己原來對果樣野咁有熱情。好似我咁,小學因為小聰明,只要上堂聽書,考試唔使溫書都可名列前茅。升中後接受填鴨式教育,讀少陣書都唔得,當然成績麻麻啦。我由細到大都唔鐘意讀書,美術體育縫紉,大家認為無謂既科目一定最高分。4年大學主修時裝設計,頭2年讀埋晒D唔關事既科目一樣走堂抄功課。到第3年,正式上主科堂,3吋厚服裝歷史書,我晚晚查字典寫notes,感覺大開眼界,讀呢本書對我而言係一件樂事!果時先知原來對自己有興趣既事,係可以咁瘋狂。由一個一打開書就釣魚既人,變成通宵夜讀都唔累。當然上其他設計同車衫等既課堂,亦係我大學時期最開心既日子啦!所以我好明白有時唔係一個人想去hea,而係如果佢對果樣野無興趣,真係無得迫!

 

1377347_619240691432272_473545279_n

 

 

好似我地上年幫呔仔細細參加左一Martial Art興趣班,類似武術之類野。細細還好,呔仔就完全發夢。有時爸爸見到呔仔咁樣,會有D怪呔仔,覺得點解佢少少野都跟唔到人地做,成日遊魂四圍望。最後呔仔話佢唔鐘意上堂,結果完左個session,我就無帶同佢地去了。但在於我而言,其實呢個係一個既過程,比佢地接觸唔同既野,有時唔親身經歷,唔會知道自己鐘唔鐘意。所以我又覺得唔可以怪佢,佢只係未遇到自己鐘意既,發夢係好正常。

 

今年年頭佢地開始參加泳班,其實上年已經試過,但因為凍水池佢地凍到唔肯落水,結果等呢間暖水池有位先可以再上堂。哇!完全意料之外!呔仔細細鐘意到不得了!每次上堂都急不及待想衝落水,上完堂又即刻問幾時可以再游。同之前參加武術班係完全2回事!到而家學左4個月,每星期課堂只係半小時,2隻野已經可以自己游到15尺遠。而響游泳既過程之中,係絕對睇到佢地自信既一面,令我十分喜出望外!

 

搵到佢地一個小小既興趣,我其實好開心,又有D感動。因為真係唔可以隨便去睇少一個小朋友,覺得佢做唔到某D我地大人認為佢應該要做到既野,就覺得佢無用呀!做咩咁都做唔到呀? 錯喇!佢做唔到可能係因為果樣野唔適合佢,又或者唔係佢與生俱來喜歡既事。我相信每個人都有佢專長,而呢個專長唔一定係學校有既科目,佢讀唔到書,記唔到幾百個生字,唔代表佢無用,可能佢既潛在力比讀書記字更高!而我地做父母既,可以以小朋友性格去佢多方面既興趣。希望大家對‘叻’小朋友,可以有另一番體會。

 

1

 

2

 

3