開心日記

459418871

 

早排睇書,講到點樣培養子女建立樂觀正面的態度。

 

其中一樣,係寫「快樂」,記低每日一件開心事,或值得感恩的事。若持之以恆,日積月累,相信小朋友可以慢慢發展出樂觀正面態度。

 

唔知得唔得,即管一試。

 

但係兩隻小鬼仲細,要佢地自己寫低,有難度。轉一轉方法,試下口頭問下佢地:「今日有乜野開心事發生過呀?」

 

我通常會係食晚飯時問下兩隻小鬼。初時,佢地唔係咁明白,但試下試下,佢地開始講到啦...

 

「今日係學校做小助手,幫老師。」

「今日係學校食飯,有得食豬骨,好好味。」

「今日係學校得到五張獎勵券。」

「今日學識左踩單車,好開心。」

「今日爸爸媽媽帶我去沙灘玩。真係好好玩。」

 

兩隻小鬼覺得開心的事,離不開「食」同「玩」,小朋友就係咁簡單直接啦。

 

見兩隻小鬼開始明白乜野係「生活中的開心事」,我開始試下問佢地:為到呢件開心事,要多謝邊個呀?」佢地漸漸識答,要多謝老師,要多謝校工姨姨...等等。

 

經過左約兩個月的「」,有兩件奇妙的事發生左...

 

第一件:有一晚,遲仔自己拎本簿仔出來,寫低當日的開心事。

 

第二件:有一晚,我唔記得問兩隻小鬼有乜開心事。齊齊突然問我:「爸爸,你未問我今日有乜開心事喎,你估下我今日有乜開心事?」

 

從呢兩件事,可以睇到,經過一段時間「培養」,小朋友可以「習慣」去發掘生活中發生過的開心事。雖然遲仔並無繼續用呢本簿來記低開心事,但係兩隻小鬼已經會主動咁分享佢開心事,我亦可趁機「打蛇隨棍上」,了解佢地的生活、想法...呢個階段,我已經覺得好足夠。

 

我會儘量幫佢地記錄低佢地的開心事,希望遲啲可以俾佢地睇番。

 

其實,自問自己不是一個樂觀的人,深明悲觀性格的人的苦況,希望可以一家人,大人同小朋友一齊學習!建立樂觀積極的態度,滿有正能量的去面對生活中遇大的挑戰!

 

016 2014-04-26 23.56.22