放慢腳步的驚喜!

我係一個幾性急既人,諗到就要即刻做,唔等得,要做完晒所有野先訓得安樂果種。就連日常生活家頭細務,我都係鐘意快手快腳,拿拿淋攪掂晒D野。全職媽媽時間有限,基本上係由早做到晚,送仔買菜自己食D野,中午接仔有時去公園玩,然後預備下午茶預備晚飯,洗碗洗衫褶衫,中間仲有時間就執屋拖地,因此私人時間就更有限,早D攪掂晒2個仔,就早D有得抖下做自己野喇!

 

講到呢度,我就發現我湊仔都有一個大問題,就係我太心急喇,有時會抹殺左佢地既機會。好多時佢地想幫手,我已經一馬當先攪掂左!哈!又有時佢地會想幫手褶衫,但我知道佢地攪完一輪,我又要由頭褶過,所以都會耍走佢地,叫佢地做自己既野。其實咁樣係唔岩,漸漸佢地就依賴左我去做,無左呢個責任心,亦唔到更多。雖然佢地既野已經自己做返,但既然咁有心想幫輕媽咪,我都唔應該因為怕被拖慢而拒絕既!^^

 

嗯!為左佢地好,我知道我要放慢腳步教呔仔細細一齊做喇!早排開始,我比呔仔細細跟我。佢地好鐘意做清潔,執垃圾之類既工作,咁我就分配左掃地拖地,同埋抹臺凳抹牆既工作比佢地。雖然佢地攪完一輪後我都要跟手抹一次,但佢地開始有板有眼,識得擦地時向一個方向,咁D塵就唔會響後面跌返出黎。睇黎好快,清潔既工作有人接手喇!Yeah!!

 

有小朋友後,好多野都要重新。改變唔一定係壞事,反而好多時會有新驚喜。好似佢地幫手,自己唔心急既話,其實對相方都係一件非常好既事,佢地亦得到唔同既體驗,增加對屋企既責任感。

 

睇完呢篇文章,希望大家嘗試放慢腳步,比小朋友多D空間,可能同我一樣會有新驚喜呢!

 

~某早上呔仔細細清潔隊又出動喇!~

 

20140729_125754 20140729_125838 20140729_125852 20140729_125931 20140729_125934