小孩愛話事

1

 

小朋友開始長大,能力愈大時,會愈想做主導,想話事,呢個係佢自然成長既一部份。而父母比佢地適當既話事權,不同選擇等,係有助於佢地建立自信,可以顯示比大人知道,佢地都可以做選擇,可以決定自己一D事情,有滿足感又開心。但作為父母,我地係咪由佢地鐘意點就點呢? 嘿嘿!當然唔係啦!我地係父母,主導權一定係響我地手上。以下係一D我幾年前響一個叫 Love and Logic 既育兒講座度聽返黎,覺得好好用既小把戲,響度同大家分享一下。只要掌握到個重點,就可以自由發揮,大家不妨袋住先!哈哈!

 

** 每次只比兩個選擇!

 

其實兩個選擇對於小朋友黎講,已經足夠。佢地要既係話事既感覺。覺得我地尊重佢,聽佢意見,唔係所有野都係我地決定左,就要佢跟住做。而比兩個選擇佢地,佢地可以快D作出決定,唔需要左諗又諗。不過,其實兩個選擇,佢地都可以諗好耐架喇。

 

** 比小朋友既選擇,都係我地同意的!

 

意思係,無論佢地揀A定B,我根本唔在乎,哈哈!例如早餐,佢可以飲果汁或牛奶;食麵包或麥片;著外套係我幫你著定你自己著;著襪係著左邊先定右邊先... 有無留意到一樣野,我地比佢地既選擇,唔係你做定唔做,而係你點樣去做。因為D細路最鐘意同大人拗數,就係話我唔做呢樣唔做果樣,所以我地要緊記喇!比選擇權佢地既意思,唔係做唔做,而係點樣做。呢個就係我之前講,需要掌握既重點喇。

 

** 遇到小朋友要選擇C,又如何呢?

 

講座舉左一個例子,我幾 buy 既,係話如果小朋友AB都唔要,死扭要C,而C呢個選擇係唔存在既,咁點解決呢。例子,小朋友揀衫著,比紅色藍色佢揀,即使解釋完佢仍堅持要未乾果件綠色衫。咁我地可以做既,就係話佢知佢再唔揀,我地就幫佢揀架喇!而當我地揀既時候,記得揀件你覺得佢會無咁鐘意既,咁唔使幾耐,佢就會揀返佢自己比較鐘意,即係另外果件。呢個小把戲,係你專登同佢作對,而佢最後亦覺得佢自己揀既同你揀既唔同,即係扭唔到綠色衫,都仲係自己話事唔聽你支笛。但其實佢地唔知道,最後,咪又係響我地掌握之內!哈哈!