從玩耍中學習

3

 

講呢個 topic 其實好好笑,我諗唔少父母同我地一樣,好多時買玩具係自己想玩多過小朋友鍾意,結果買到一屋都係,哈哈!不過其實小朋友真係好需要玩玩具架!佢地由 BB 時期,已經開始從玩具中學習。當然,唔係擺低比佢自己玩,而係父母陪佢一齊玩,一齊互動。咁樣唔單止同小朋友關係更親密,而响玩耍既過程中,大人可以不斷教導當中既事情,小朋友亦得到好多唔同既啟發。

 

細個時呔仔細細鍾意玩火車,砌路軌等。而到佢地依家5,6歲既年紀,咁多玩具當中,佢地最鍾意玩Playmobil 同 LEGO。我自己亦覺得呢2種玩具好有教育性。我講既教育性,並唔係書本文字上可以學習到既知識,而係玩場景,角色扮演時,响唔同情況發生之下,佢地學習到既應用常識。

 

例如玩 Playmobil,扮演消防員面對一座大樓火燭,要點樣救火,而被困既小朋友應該有咩反應? 應該盡快逃離現場,有濃煙既時候要搵濕布蓋住口鼻,要伏低爬行。又例如,遇到有壞人搶野既時候,小朋友應該點做呢? 叫父母或途人幫手,Call 911 (即香港999)! 又或者玩學校場景既時候,返學遇到問題要點樣面對? 和同學相處既時候要禮讓等等。好多小朋友未接觸過,但將來有機會發生既事,响玩呢啲角色扮演遊戲既時候,就有機會聽下小朋友自己對事件既反應(順便睇下佢地醒唔醒目),同時亦可以教導佢地遇到問題時既正確應對。

 

另外,剛剛呔仔收到一份 Doll House 生日禮物,裡面有客廳、睡房、廚房同廁所。我發現呔仔好鍾意設計唔同既環境,將傢俬配件擺在唔同位置。一齊玩既時候,佢有時會鍾意拎住隻貓扮亂跑,掃到成屋亂晒!哈哈!之後又會扮暈低,要 call 白車送入醫院。除左擺傢俬外,佢會不停諗好多事發生,令到呢份玩具好有玩味!大家屋企有呢啲玩具,可以參考呔仔既玩法,佢同細細次次笑到碌地架!哈!

 

 

1

 

 

至於 LEGO,應該係每個小朋友都喜愛既玩具。除左跟佢本身造型砌之外,呔細鍾意自由創作,每次都變出自己覺得好勁既車呀,飛機呀,警局,垃圾場地等等。LEGO 真係可以啟發小朋友無限創意,就好似之前睇左果套 LEGO MOVIE,裡面既機械人,就係用不同既配件自由創作出黎,我覺得比起一架消防車一定要係消防車外型更有趣!而呔細睇完呢套戲之後,亦多左好多靈感去創作自己獨有既LEGO玩意!大人不妨同小朋友一齊玩,一齊創作,合作砌出黎既作品一定更有型呢!