小手作,大快樂!

1

 

記得細個我同哥哥同隔離屋幾個小朋友,經常圍埋自創遊戲。除左大家細個玩開嘅經典玩意,何濟公呀,埋洲之類,我地仲會研究好多唔同玩法。屋企有咩材料分頭收集,我地當時就自創左「守護神」,捉人之外我地有法寶架!可以令守護神停頓5秒,又或者慢動作5秒!哈哈!諗返起童年,真係好開心!縱使金錢上唔係好富有,但大家圍埋諗野玩,落街買牛仔片買孖條嘅日子,其實快樂真係心中富有,回憶所有都係好開心好回味的!

 

 

3

 

可能細個就係咁樣成日諗呢樣諗果樣,最叻就地取材發揮,大個就好鍾意做設計,鍾意由零開始創造一樣野出黎。又唔知係咪上天嘅安排,竟然遇到一個呢方面同我好相似嘅人,仲做埋我老公,哈!結果呢? D仔就發達啦!成日有D古靈精怪野玩。老公好鍾意自創玩意同呔仔細細玩個痛快!而家做左阿爸阿媽,心機係擺晒落D小朋友度架喇,創作力唔同左方向,哈哈!

佢地細個嘅時候,老公整過好多次紙皮SIR滑梯,睇返Youtube D片真係笑死 (可搜尋 Tylerthebaby Channel) 。又整過紙皮隧道,響地板黐膠紙行車路線等,呔細覺得非常好玩。近排就興搵紙皮盒鞋盒膠盒扮銀行、快餐店、洗車屋等。而家開始識串字,可以自己寫野,更加有趣!可能係由細到大比我地影響,而家呔仔細細都好鍾意就地取材,自己整野玩。我覺得咁樣好好呀!有好多時候發現呢樣野直接訓練出佢地解決問題嘅能力!好似前兩日呔仔響學校整薑餅屋,個個小朋友塊薑餅人都企唔穩,只有呔仔果塊識企響度唔使搵野靠。原來隻傻豬自己搵左2粒小綿花糖黐響薑餅人背面,咁就可以撐住企喇!叻仔!!

 

 

2

 

其實小朋友最開心嘅唔係你買好多玩具比佢自己一個人玩,而係爸爸媽媽陪佢地玩嘅時間。只要同小朋友一齊發揮,享受過程,已經係佢地童年最開心嘅回憶了!

 

4