PG指引家長

10405507_815485468474459_1420103061080648396_n

 

預備寫呢篇文章之前,要指一指引D家長先!以下全是本人立場,我講我自己做事作風咋下,大家睇完千祈唔好學,哈哈!

 

話說11月尾感恩節,呔仔同細細因為唔同學校嘅關係,呔仔放多細細三日假期。呢D咁嘅情況,細細一定扭架啦!點解哥哥唔使返學佢要返呢?!咁我就同佢講,佢可以3日之中選1日唔使返學,但其餘兩日就要乖乖地返學,唔可以再扭計。而其實我會同佢咁講,係因為上星期細細老師已經問哥哥唔使返學,細細會唔會都想放假呢? 老師知我一個湊兩個,如果哥哥唔使返,可能細細都跟住放埋假算喇,但我回覆老師佢會返學嘅。

 

另一樣野大家未必知嘅,係呔仔今年9月開始返緊既小學,係政府規定要返學嘅13年免費教育。而細細讀呢兩年Pre-School,係我另外比錢佢返既私人學校,預備佢正式返學可以容易跟上進度,始終我地響屋企全中文,如果完全無比佢地接觸,怕佢地5歲半先返學會難適應。因此,細細嘅學校都幾寬鬆的,放假不是問題。

 

咁當日細細選擇左星期一 (即第1日) 跟哥哥放假,我一早打返學校問老師,老師話OK,比佢跟哥哥放假玩下。咁我見放假喇,梗係帶兩隻野去睇早場,平D又唔使同人迫嘛!正當大家卜友都好開心細細可以跟哥哥放假,仲有得睇戲咁發達之際,其中有一卜友就留左個言:「壞」。

 

雖然我知道佢係善意,但睇到佢嘅留言,我都有一刻問過自己,我係咪呔細嘅一個壞呢? 我係咪要迫細細喊住返學,要狠心D同佢講佢學校係要返學,唔可以放假。定還是好似我同佢嘅協議,佢放一日假,另外兩日就要開開心心返學呢? (而細細真係守承諾,之後兩日無再扭) 係,我選擇左後者。其實話我係壞都無錯嘅,我從來都唔覺得自己係一個好。基本上我都係有左呔仔細細之後,先至覺得自己唔可以再咁任性,要盡量做好自己,等兩個仔明辨是非。有時教佢地,自己會有矛盾,會有好想咁做但又唔可以嘅時候,而陪小朋友成長,亦係自己另一個嘅成長。

 

老老實實,我唔係一個鍾意跟規矩做野嘅人,我由細到大都鍾意做D古怪野,比較我行我素,所以好多時呔仔細細做嘅事,我好明白佢地。哈哈!當然唔係話會做壞事,但我一定唔係守紀律嘅學生(可能老師覺得係,但我私底下唔係的)。香港讀中學時Day6走堂,即係課外活動簽個名就走左去坐麥記,蒲Yes!Station果D呢,二樓課室掟書包落街呢招係好經典!去到美國讀高中就好玩喇!我地返返下學會走去搭個半鐘車行好遠嘅Mall,渣車去金門橋扮遊客影相,又或者去另一間學校搵朋友,潛入人群扮該校學生食免費lunch,勁好笑!仲有最好玩嘅一定係幾個人衝學校後門逃走,D警衛又肥又論盡唔知追得邊個,又唔認得我地D唐人樣,我諗鬼佬眼中我地個個一樣樣架啦!哈哈!之後上到大學,又係經典!JoJo Cafe食早餐,齊腳就返學校點個名,之後開檯打牌。但大家要注意一點喎,就係無論我地平時點hea法,要讀書考試時係好有分吋,個個大學畢業。返學除左讀書考試外,點樣平衡到喪玩喪走堂但又光榮地畢到業都係一種訓練黎架!我地玩還玩,唔會影響大局嘅!又老實講丫,無大學畢業嘅朋友而家搵錢多過我地啦,所以大家唔好睇得讀書太重,一個人嘅永遠最重要!!

 

我同意作為父母真係要做一個好比小朋友學習,但呢樣野係咪只在於返齊學? 跟足規矩唔可以有偏差? 咁自己嘅想法呢? 創造力量呢? 正如我自己,如果讀書時係個乖學生,每日準時返學放學,努力讀書優異畢業,日後我諗起讀書嘅時光係咪就只有書本呢? 又,如果讀書時係咁刻板既話,可能我嘅性格又唔係而家咁有趣,咁熱愛生活。每個人行嘅路都唔同,乖學生當然值得讚揚,但偶爾無傷大雅地破壞一下規矩,都係一件樂事黎架!^^