愛在心裡請 ENJOY

10344127_10152753237611586_2115318771935797361_o

 

同小朋友相處嘅每一日、每件事情我都得到好多啟發。特別是佢地處理問題時嘅反應,令我覺得佢地好純真,好想保存佢地呢顆純潔的心。

 

有日呔仔細細唔執玩具,叫左成個鐘都懶懶閒,執極個廳都係咁亂,我開始發火啦!罰佢地企,然後梗係哦佢地一輪,不停講道理。呔仔細細知道激到媽咪咁嬲,佢地都唔敢出聲,我亦全日唔啋佢地,實在太過份!之後呔仔拎左我前排寫比佢地嘅一封信,遞比我睇,內容係我寫住我愛佢地呀,掛住佢地呀之類啦。咁當時我仲嬲丫嘛,我就同呔仔講,呢封信我唔會比佢架喇,我會撕爛佢,掉左佢!佢聽到後就偷偷喊......我唔理佢啦,要罰下佢,等佢上心,知道咁樣會令媽咪嬲。到晚上,我全日唔理佢地,等爸爸幫佢地沖涼刷牙,我一直唔出聲,然後臨瞓果刻,呔仔話佢有嘢送比我,原來係一封信。

 

信其實好簡單,只係寫左 TO MOM,畫左一隻蝴蝶同埋一個心心,但佢用果張紙,就正正係我寫情信比佢地果張。其實我知道呔仔想氹返我,但佢又唔識講一D說話去氹,我反而好感動佢會咁樣做,我覺得行動比講出口嘅說話更加令我動容。

 

事實上,小朋友就係未識用言語去表達自己,但只要我地留意佢地做嘅野,就會發現其實佢好愛你,想你開心,只係擺響心入面無開口講。我覺得咁樣反而更純真,更值得我地珍惜!大人做錯事,可以講好多借口,或者好多承諾去令對方寬恕,漂亮嘅說話人人識講,但真心真意做一件事去要求別人,響大人嘅世界入面就好難得了。小朋友唔同,佢地會用個心去對每一件事,會用自己嘅力量去令對方佢。我有時覺得,佢地做每件事背後都有意思,唔係我地大人成日覺得佢地只係無聊地做。只要我地諗多一步,就會更加了解佢地嘅想法。下次比佢地激嬲時,不妨留意下佢地嘅反應同做法,睇下佢地係用行動表達,定係已經識得用花言巧語去氹你地??^^

 

10489638_10152753268641586_8600304187566030133_n