父母就是小老師!

11033188_10152733473156586_2883606981090203607_n

 

而家呔仔細細除左每星期一次游水堂外,佢地並無參加任何課外活動。我地好珍惜同2個小朋友相處時間,星期六日老公唔使加班的話,都會搵地方同2個仔去玩,簡單咁踩下單車,玩公園,其實小朋友已經好快樂。可能大家會覺得外國無香港咁大壓力,學少一樣野都唔夠人爭。錯喇!其實呢邊一樣有較多中國人嘅私校,一多中國人,就唔知點解好鍾意鬥叻!佢地一樣好怪獸,放學放假學呢樣學果樣,務求入小學就要達到升中學咁嘅 level。所以我覺得,雖然大家身處於壓力大嘅讀書環境,但仍然可以有自己嘅選擇,幫小朋友編排多D玩樂時間。

 

一直都想比呔細參加畫畫班,我本身覺得培養小朋友運動同藝術嘅興趣係好重要的。琴日終於的起心肝帶佢地試堂。呢次遇到一個好好嘅老師,同佢地試完堂後,老師同我講,佢地對畫畫好有概念,控制得好,但你其實唔需要黎上堂,你響屋企都可以教佢地畫。因為上堂時,老師坐響細細果邊教佢,而我係坐左響呔仔隔離一直教佢畫,可能因為咁,老師睇到我點教佢,覺得唔需要特別花錢去學。因為佢地而家都係學簡單線條、填色、用色等,老師話等佢地大D,有基本技巧後,再搵佢教佢地油畫素描等。

M

 

唔知老師係咪想幫我慳錢,哈哈!但其實未決定上畫畫班時,D朋友都話我應該自己響屋企教,因為我本身鍾意畫畫,會好享受教佢地嘅過程。只係有時自己會懶,會諗住比佢地去學,每個星期都 keep住有段時間去做呢樣野,訓練佢地耐性同專注力,因為比左錢就一定會去架嘛,哈!但聽完老師嘅說話,相信我今次係要的起心肝自己教,每星期要抽出一個時間,同佢地黎一個畫畫堂。哈哈!其實諗落都幾得意,媽媽就係小老師。大家都可以諗下,自己有D咩專長喜好,一樣可以同小朋友分享,設立一個親子,父母就係小老師。小朋友得益之餘,又可增進,不用花費,但收穫卻喜出望外!