童心看世界II

10997632_10152727538236586_6770865620310640519_o

 

之前寫過一篇叫〈童心看世界〉嘅文章,然而同小朋友相處真係每日都有好多驚喜,有好多唔同嘅感受,相信呢個 topic 可以一直寫落去。除左一直陪住佢地成長,睇住佢地一日比一日懂事,每日都有進步之外,我最享受嘅係佢地未被污染嘅心。話污染可能嚴重左,應該咁講,佢地太新淨喇!佢地嘅思想未被限制住,對所有事物都未有一個模式,所以比起我地大人,佢地嘅思想可以好天馬行空,可以更多姿多釆!

 

今次又同大家分享一件我覺得幾有趣嘅小事件,等大家下次聽到小朋友對事物嘅睇法時,都可以好好品嘗佢地嘅純真。我係架!我成日嗒佢地講嘅野,仲要係慢慢嗒果種,了解下佢地既內心世界嘛!

有次放假,天氣好好,同兩隻野渣遠少少車去食 lunch,呔仔細細坐後面,我見前面大塞車,就諗,前面梗係撞左車喇!同呔仔細細講,我地無咁快到呀,前面勁塞車呀!呔仔就話,係咪因為好好天所以個個都渣車出街,所以 freeway 好多車呀?我話應該係啦,好天丫嘛,個個都好開心咪出街玩囉。但其實我果刻有D驚喜又有D感動,點解我一塞車就會諗係前面撞車架呢?而唔係好似呔仔咁諗,因為好天因為開心所以多人出街玩呢?佢諗嘅野,反映出佢嘅內心世界係好開心,人人都快樂,唔會有唔好嘅事情發生咁。果刻我鼻酸酸眼淺架,我覺得佢思想好純真,好正面呀!好彩我無一開聲就講話梗係前面撞車之類野。其實好多時我地唔知道,我地大人所講所想嘅野,係直接影響小朋友對事物嘅睇法。如果我今日咁講,可能下次再塞車時佢已經會話因為前面撞車了。當然,兩者都有可能發生嘅!只係我好想保存佢呢份,現實遲早佢都要面對都會明白,但係一去不返架!大家都要好好珍惜小朋友嘅單純快樂,好好享受佢地呢個階段。