advertisement

放復活假前,細細果班有Egg Hunt 活動,成個草地擺滿晒裝滿小禮物既復活蛋,有大有小,有彩色有金光閃閃。個個同學聽到一聲搖鈴,都衝住去執最大最閃既蛋,正常黎講,大蛋一定裝得多D禮物仔,又或者可以擺到一件小玩具。正當個個瘋狂執蛋之際,我見到細細施施然慢慢行,逐D蛋望下又無落手,忍唔住提佢: 「就黎比人執晒,無蛋喇喎!」佢先開始走去執D細細隻既~ 其實我早已習慣呔仔同細細呢種執輸行為,我又無特別去解釋佢地知咩叫執輸,我覺得咩都唔執輸個人同心態都會好辛苦,所以我無諗住教呢D,反正佢地都開始發現唔少同學會因為唔想執輸而發癲,知道爭奪並唔係一件好事。

shutterstock_348184277

例一,呔仔放學會同我講,阿邊個同學成日要爭企第一,企唔到又響度嬲!我會話,佢想企咪比佢企囉,邊有人咁on居鐘意企第一架,梗係排中間最好啦,前後有人夾住你呀,有咩事都安全好多啦,咁先醒架嘛!考試第一就真係叻喇!(趁機暗渡呔仔) 之後呔仔會話,係囉,企第一有咩咁好呢?

 

例二,細細班上有件又係難攪,見過佢自己用完既顏色筆死keep住唔放比同學用,所以無咩人願意同佢玩。然後染蛋果日,佢又因為老師唔叫佢去染先,爆喊dum地癲足半粒鐘,老師已講明愈快安靜既同學就可以去先,佢愈嘈咪愈無得去,結果因為心情未能平復,佢染最尾。

 

就呢2件事,我地睇得到其實好多人,甚至幾歲細路,對於執輸果份執著其實好大!一個人開唔開心,就係在於有無放下既心態,心胸廣唔廣闊,係直接影響成個人生!所以點解我成日想令呔仔細細有寬廣既心,教佢地咩都讓人啦,無所謂啦,因為如果你咩都怕蝕底怕執輸的話,個人會好容易唔開心,亦會因為太計較而無左好多好朋友!

 

細細執蛋呢件事,令我諗起一張之前見過既圖畫-大小蘿蔔。圖中2兔仔,一隻拔緊表面上係好細的綠葉,其實泥下舊蘿蔔好大,而另一隻拔緊好大棵綠葉的,連著係一條好細的蘿蔔。

carrot

我好相信呢個道理,你眼見搶住要最好最靚既野,其實並不如此,得到既可能比其他願意次要的人少!而心胸廣闊,禮讓唔怕蝕底的人,往往得到既係出人意表的快樂!所以果日見到細細執BB蛋,其實我暗裡幾高興,希望佢地長大後都可以繼續願意蝕底,有寬廣既心。