advertisement

兩個讀緊小學既仔,每日放學返黎,都會話我知今日響學校發生D咩事,同邊個同學玩得開心,另外D同學又做左講左D咩。當中不乏一D會取笑同學既行為,可能只係一時開玩笑,大人聽到都未必覺得特別問題,但如果被笑既同學唔開心,已經係一件有傷害性既事。其實每個人受嘲笑既承受能力唔同,有D人好講得笑,完全唔介意被玩,但有D小朋友,你笑左佢,佢可能因此變得自卑,或者會唔開心好耐。我教兩個仔,唔可以用你自己覺得無問題既說話去笑人,如果對方覺得唔開心,已經係好有問題,必須道歉!

 

 

好似琴晚話整烏冬做Lunch比仔帶返學,大仔話,唔好啦一陣比人笑架! 我奇怪,咩帶Lunch都會比人笑架咩? 全班有一半以上同學都帶Lunch喎!佢話唔係,係帶烏冬麵,其他小朋友都無帶過烏冬麵。我解釋佢聽,人地會笑係因為佢覺得新奇,唔係嘲笑你,可能只係未見過,小朋友覺得D野古怪,就咩都笑一餐架啦,出發點係正面的,你笑下咪算,唔需要咁介懷人地既反應。佢問: 如果佢真係嘲笑我呢? 我教佢,如果要以嘲笑人戲弄人,令人尷尬唔開心,佢先得到存在感,先覺得自己叻既話,呢D人天生係Loser,係失敗者!咁你見到佢笑你,你只會可憐呢個人咁失敗,要靠傷害其他人尋樂,可以完全漠視佢!當嘲笑別人既人得唔到預期反應,你唔動氣唔尷尬,久而久之佢就無癮了。如果佢敢再進一步,你就向老師投訴啦,我都會直接搵佢父母討論下,睇下佢地點樣教小朋友。

 

學校指引,嘲笑欺凌同學,係嚴重行為,可以停學的。其實唔止美國,相信大家響讀書生涯中,都發生唔少呢D事,就算主角唔係自己,總見到幾單響自己身邊發生吧!記得小學時,有個肥仔同學,成日比人笑,班男仔又唔多同佢玩,你知啦肥肥矮矮帶副眼鏡呢D,真係好易比人target。機緣之下,小六果年佢坐我隔離,我同佢幾好朋友,坦白講我係有專登關心佢多D,成日同佢傾計,等佢開開心心過埋呢年,哈哈。我唔知呢件事佢會唔會記得,但響畢業冊上面,佢同我講多謝,話班同學中得我一個會咁關心佢,佢好開心今年同我坐之類。我地讀屋村學校,班男仔生蕃咁醒目到爆,肥仔又豬豬潤潤,真係唔蝦佢唔知蝦邊個,而我自問抵笑能力都唔錯,不嬲比較我行我素,所以果年冒住比班男仔唱暗戀,都要同佢friend!真正既Winner,係你會關心別人,存好心做好事,有寬宏既心,就算比人笑,都可以一笑置之!