advertisement

在「湊仔學」黎講,好多野都係相對性。自己湊左8年仔,最近我經常自我反省,睇下點樣可以推動到對仔更有動力去做佢地既份內事。當然呢個都同佢地本身性格有關,其次就係父母既行為,直接影響到佢地變成一個點樣既人。我發現,愈心急愈勤力既媽媽,係會愈容易令小朋友變得懶惰。我自問係一個非常心急既人,好多野叫佢地幫手做野,我係情願自己快手快腳做完,唔想等佢地慢慢整。其實咁樣係好錯,除左無比機會佢地學習之外,更差既係佢地會長期依賴左媽媽,問題來就張口嗌,一嗌媽媽就好似救世主咁,佢地習慣要咩有咩,沖完涼拿條底褲都唔使自己出手,慢慢變廢人。

 

話說,我媽咪就係人版。我唔想話係反面教材,雖然事實真係,但我既童年一直到成年都係超有愛超開心的,因我媽咪幫我擋晒所有煩腦。回憶之中,我一直都係被溺愛的一個廢人,係幸福的,但有長遠後顧之憂。女仔還好,好彩的話嫁個好老公,繼續有人照顧,繼續生活於自己個世界,不過性格就..都係大鑊架喇。而男仔呢,無用就真係好大件事喇!好怕D男仔姐手姐腳,踢一踢動一動,做咩都懶懶行咁,第時點樣照顧屋企人呢? 至於我,幾時開始做返個正常人? 就係入大學開始,媽咪唔響身邊,佢港美兩邊飛。我開始要用自己既方法照顧自己,雖然都係hea做,但漸漸學識點樣去做返個正常人,不過性格都唔係好。以前去朋友屋企食飯呢,我覺得食完飯要洗碗係件好無面既事,我會覺得,我媽咪都唔使我做啦!拿,呢D咪無家教囉!縱出黎架!之後讀書時喪做part time,開始行返出個世界,知道出面做野係點,我學識點掃地,都係以前Coffee Shop個老細教我架咋,佢話: 你咁大個人連地都唔識掃架? 又做過幾份好大壓力既工,受D客氣,忙完一行返入去D眼淚係咁流。應該就係呢D位令我成長的,令我學識忍耐,原來個世界唔係以我為中心,有挫折就自己企返起身,無人會幫到你,咁小事就捱唔住,人生注定係失敗。結果我開始獨立起黎,開始懂事,更開始照顧埋身邊既人。

 

 

原來好多野都係相對的,無左媽媽響身邊既小朋友,係真係堅強獨立好多。我都不停咁放緊手,叫自己懶D再懶D,盡量比多D野兩個仔做,做得慢又好點都好,自己抖抖吧,對大家都有好處。錫仔同縱仔係一線之差,教識佢地自己有生存技能,總比甚麼都幫佢地做晒來得長久而有用。