全職媽咪分享教仔大難題: 錢同價值的概念

老實說,我從來並唔係一個對金錢好有觀念既人,特別是儲蓄方面,細個更係有幾多使幾多。或許屋企無咩經濟壓力,以致我一直唔覺得有需要儲錢,直至有左小朋友之後,先知好多支出係要一早儲備,例如返 Preschool 政府唔會支助,當時2個小朋友夾埋,每個月突然多左差唔多1萬5千港元支出,呢D真係唔可以到時先算。這些湊仔既日子以來,我明白到儲蓄既重要性,因為作為一個全職師奶,頭幾年無咩生產能力既時候,就係要幫老公慳錢,要好努力咁儲佢D錢,先可以維持到收支平衡。老公好醒,從來唔會過問財政,只需一張信用卡可以食飯買咖啡就得,皆因佢都唔係一個懂得理財既人,因此責任就落在我身上了。

 

至於兩個仔,我無特別灌輸佢地儲蓄觀念,所以佢地對錢同價值無咩概念,只係知道幾蚊唔多,幾千蚊就好多,亦無儲錢概念,成日咩都話買。直到近日,爸爸帶兩個仔去睇車,大仔話第時都想買一架自己鍾意既車,又想買一間屋有四層,可以比我同爸爸一層,細佬一家一層,佢一層,仲有一層比小動物一齊住,咁一家人就唔會分開,爸爸就乘機教佢而家要開始儲錢,否則願望就不能達成!其實我覺得咁樣教仔好好,因為自己係過來人,諗下如果早多10年一開始搵錢就儲錢,而家環境會更輕鬆,亦有能力幫助更多有需要既人。

 

 

兩個仔性格真係好唔同,記得細個時,行過街邊有D入錢既咪錶,改裝左比人捐錢,因為畫得好靚,吸引好多人影相,小朋友又圍住。當時每人比左幾個 quarter 佢地,叫佢地鐘意邊個咪錶就入落去,細仔諗都唔諗,入呀入,唔夠幾秒就入晒。而大仔呢,佢入左一半,之後同我講佢想儲起幾個,第時有用。好得意喎,我無教過佢,但佢有儲起一半錢將來有用既概念。

 

同埋我覺得小朋友對金錢觀念,其實都係來自大人身教,唔可以一路教,但另一邊自己就大使,亂買野,特別是當小朋友發現同指出自己買無謂野既時候,佢地一定會問點解你可以買我又唔可以? 此時我地唔可以講係因為我地有搵錢,佢地無,變左當第時佢地一搵錢,就會覺得自己有權亂買野,個心態唔係咁好。為免同仔解釋一輪,其實我已經戒左買無謂野好耐,而家 shopping 多數係比仔,好少買自己D野,先發覺原來大人既衫褲鞋襪係可以著好多年,哈哈!自己心態改變後,希望更早教小朋友明白儲錢既重要性,未雨綢繆積殼防飢,令佢地第時生活過得愜意一點。