呔媽感嘆 回憶做學校義工有感

 

由於兩個仔年紀相近,只相差15個月,因此當年決定自己湊番,在家工作自己安排,照顧小朋友嘅時間比較彈性。由於唔使趕住返工,送完仔之後有時會同家長們傾下偈,唔急急腳走人的一群,通常都係有在學校幫手的家長們。傾多兩句,發現其實學校運作得咁好,搞咁多有聲有色的活動,們的幫忙都好重要,因為除咗教學上嘅野,唔同活動嘅背後有好多準備工作,都係靠各人合力去完成的。
自問唔係嘅中堅份子,因我平時都好忙,只係我嘅工作冇上班時間,係自己分配時間完成工作,因此我唔會特別踴躍去做。我通常喜歡做 back up,即係個 job 無人舉手就預我,但最後我都做咗班中恆常,因為班中只的兩個家長願意幫手,真係永遠得佢兩個,所以我加入了,分擔大家嘅工作。每個星期五,朝早響學校1-2個鐘幫手,預備佢地堂課練習,下一個星期嘅功課等,總括黎講係大量影印同堂課分類。

 

 


學校每年4月都會搞嘉年華,每班貢獻一個攤位遊戲,家長學生買飛玩,玩遊戲吸印仔可換獎品。呢個係大型活動,籌到嘅錢用作學生嘅活動經費。我哋果班好厲害,其中一個家長自己用紙皮整咗個同冒險樂園一樣嘅碌波機!有一個個圈分牌,睇下拋到入邊個窿就有分數,我睇見部紙皮碌波機真係好讚賞!然後老師出 e-mail 叫家長 sign up,嘉年華由11點到4點,2個人一更,每更負責攤位1小時,結果老師出咗 3 次e-mail問,只有平常有幫手的兩三個家長回覆,其他全冇回應。

 

 

你會見到當大家興高采烈去進行一個活動,而背後冇人支持,果種心淡同失望都真係幾唔開心。結果當日我本身係 sign up 咗大仔班 1 小時睇檔,細仔班都係 1 小時,但由於冇人來接更,我由 12 點留到 4 點收檔。其實睇住啲細路玩好開心,時間亦過得好快,兩個仔就四圍玩,又過黎攤檔探下我。
而有日響教員室,我聽到籌備呢個大型活動嘅家長傾計,話有一個 class 完全冇家長參與,老師出動到來做有免費波飛送,都無人來,真係激死個老師,哈哈!然後佢地講咗一個情況,就係有好多家長永遠唔會幫手,但嘉年華時,你見到佢地差不多由朝到晚都響度同小朋友玩,食熱狗食棉花糖。咁既然都嚟玩,點解唔可以用少少時間幫番自己班嘅攤檔??真係講唔通的。
其實幫學校做嘅野都係用返響自己小朋友身上,如果大家都分少少時間出嚟幫忙,老師同其他家長都會做得更起勁,同時又可身教小朋友幫助別人,係一件好有意義嘅事呢。