放假唔得閒帶仔去玩 呔媽要仔仔幫手做家務培養責任感

家有兩個仔,年齡仲要只差 1 年 3 個月,好多朋友一聽到就頭痛,覺得佢哋一定係不停煩擾,每日家嘈屋閉。而事實上,呢啲情況好少發生,我哋屋企大部份時間都幾平靜的,可能因為我哋兩公婆都唔鐘意吵鬧,平時對話都係心平氣和,我覺得家庭氣氛係由大人做榜樣去維持,慣咗一個模式,小朋友好自然會跟住做。

 

放假未必得閒帶仔去玩,點算?
咁你可能會話,兩個都係仔咁活躍,響屋企一定無時停,如果放假大人唔得閒帶佢哋出街放電,又唔想佢哋響屋企全日睇電視篤電話,咁點樣可以消耗佢哋嘅精力,等佢哋唔好咁得閒響屋企搞搞震呢?

 

我哋會做嘅,就係派佢哋做屋企事。即係我哋做緊咩,唔好嫌佢哋阻住,拉埋佢哋一齊做,好似我洗衫,就叫埋佢哋一人拎一桶,幫手做。而佢哋最鍾意嘅,當然係跟爸爸做嘢啦,例如出去清除雜草,洗車,又試過幫爸爸髹廚房啲櫃門,呢啲一做就做幾個鐘,係非常好嘅學習時間,又能增進父子關係。

 

4 歲幫手砌傢俬
爸爸好鍾意拉埋佢哋做嘢,覺得男仔一定要落手落腳,咩都幫吓手,唔好坐響度唔郁。響佢哋再細啲,4-5歲時,試過買咗 IKEA 傢俬返嚟,已經叫佢哋幫手扭螺絲,咁當然我哋係要跟手做,但見到佢哋完成配給項目個自豪樣,係好滿足好快樂的。

 

 

 

 

 

 

培養,唔要變廢柴!
叫佢哋幫手做屋企嘢,除咗可以 kill time,其實仲有樣大好處,就係令佢哋對家庭有責任。眼見太多年輕人,特別是屋企比較富裕的,啲小朋友真係咩都唔做,最簡單連主動幫父母拎重嘢都唔會,莫講話要點樣照顧父母,搵到錢要幫屋企出一分力。

 

然後你會睇到啲仔對屋企有責任,會照顧家人會做屋企嘢的,比較同只識攤響度打機,錢來張手飯來張口的有幾大分別。

 

有時真係好怕小朋友會變咗咁樣,始終我哋呢一代,小朋友已經唔太需要吃苦,不是捱出來的細路,好大機會變廢柴!自己能夠做嘅,就係盡量比多啲嘢佢哋做,比多啲責任佢哋承擔,希望佢哋從小習慣做個有用嘅人,第時大個對家庭及社會更有貢獻!