同兩個仔同床 8 年,見佢哋愈來愈大,覺得係時候習慣分房瞓,點知……

同老公,已經有8年了。記得 9 年前剛生完大仔時,我哋仲係一齊睡的,為方便半夜埋身餵奶換片,就將BB床一邊欄拆咗,拼埋落我哋張大人床度。

 

由於BB床高度可校,拼落大人床剛好,大仔就經常碌埋嚟黐住我,我有時又推返佢過去,哈哈!

 

直到細仔 15 個月後出世,因為怕細佬半夜嘈醒老公同哥哥,我就同初生細仔睡過隔離房激戰,又幾個月後,老公頂唔順大仔半夜嗌呀搵媽咪呀,結果老公過咗隔離房,我就同 2 個仔睡回大床,開始長達 8 年的左擁右抱的戀子時光。

 

8年的「戀子時光」
響呢 8 個年頭,我已經習慣咗一起身就見到兩個豬樣對住我笑,叫媽咪早晨。呢段日子係好甜好溫馨,係無可取替的,但當中亦有無數個艱苦晚上,一人作戰,真係深深體會到何為眠乾睡濕。

 

好似佢哋細個有哮喘有濕疹,有段時間晚晚睡得差,大仔連續 3 個月睡前要聞氣擴張氣管,唔係半夜一咳開又成晚唔使睡。

 

細仔有濕疹,發起上嚟,成晚抓成晚嗌,我又抱住佢梳下梳下,等佢冇咁痕易入睡,經常半坐咁休息,可能坐姿不好,我長期腰痛。

 

而其他傷風感冒發燒等閒事,就更不在話下了。我成日話,自己經歷緊,其實當年我完全唔覺辛苦,可能根本冇時間辛苦,只知道全副心機精神都係日日湊住兩個仔。

 

依家過晒呢啲壯烈時間,開始輕鬆喇,有閒情回頭一望,先覺得自己過去 8 年原來都真係幾堅!

 

大半年前,終於決定
老公都有幫手的,一有時間就湊仔陪仔玩,不過佢返早,六點幾起身,工作又高危,所以半夜我盡可能都唔會叫醒佢,等佢有充足睡眠,第朝有精神返工。
雖然十分不願意,但始終係仔,都唔可以一直同我睡。

 

就響大半年前,老公執好間房,擺咗兩張單人床,比佢兩兄弟習慣自己睡,要分開我同對仔了。細佬一向獨立,佢大情大性,無憂無慮的,第一晚自己睡已經OK,一覺睡到第二朝。

 

大仔就慘喇,同我一齊失戀咁,我當然睡唔好啦,成晚過去吼住對仔,慘到想喊,但又唔可以表現不捨,影響佢哋。結果大仔半夜一走來搵我,我又即刻走去陪睡,兩個禮拜晚晚連場大戰,結果衰咗!

 

 

(待續……)