學校 Picture Day 呔媽幫兩個仔揀定靚衫靚褲，點知畀呔仔一句說話當頭棒喝……

記得細個時，媽咪總會幫我做一啲佢認為為我好嘅事情。例如一到冬天，我媽咪一定迫我着襪褲返學，唔會畀我着長襪，同時又一定要我着冷背心響校褸入面，佢好怕我冷親。當時我覺得好樣衰，其實返到學校我一定會除冷衫除褸，上中學後識自己帶多對襪番學校換添，哈哈！

小時候變相呃媽咪，幸懂克制
從小我就學會「明順暗反」呢個行為，原因唔係我反叛，而係當我見到媽咪好有心地為我準備咗一大堆為我好嘅嘢，我唔接受又傷佢心，我被迫接受又難堪，當然有反對過但唔成功嘅。咁我唯一可以做，就係盡量平衡番雙方感受，此舉可令佢安心之餘，我又能顧及番自己感受喇~

但呢個「明順暗反」，並唔係一個好嘅開始，因為講明白啲，其實就係欺騙。美其名係顧及雙方感受，漸漸大個啲，到中學喇，就轉變成呃媽咪。明知佢唔批准嘅事，瞞住做，唔想佢唔開心，但自己又想開心喎！雖然唔係做啲咩壞事，但可能媽咪管得都比較嚴，變咗同學仔可以直接同媽咪匯報嘅嘢，我就要兜個大圈先批准嘅，唯有慣性吹水，免卻大家爭執。

亦因為咁，我覺得整個成長過程，其實我媽咪唔係咁了解我，亦唔知我響出面做緊啲咩，咁樣並唔係一件好事。可幸嘅，係因為我習慣「明順」嘅關係，我好識衡量自己唔會做出咩大錯事以致自我引爆，免得激親媽咪，我做事都算有分寸的。

少鬧少罰 種善恩得善果
由於太明白物極必反，到自己做人媽咪喇，我經常提醒自己要聽小朋友心聲，要同佢哋做好朋友，唔可以用強權手法教仔，因為我好明白，即使佢哋明順，亦同樣能暗反。咁你寧願小朋友做咩都會問你意見，同你商量，定還是事事恭維(因唔想同強權的你爭吵)，但做嘅又係另一套？

舉個例子，我兩個仔 8 歲 9 歲了，兩個響學校做過嘅事，每日放學都會傾講，好事壞事，甚至被罰嘅錯事，都唔會隱瞞，我覺得咁樣好好呀！善因係佢哋從小做錯事，我哋唔會亂罵亂罰，我哋會畀機會佢哋解釋改過，發現做錯事情時我哋亦甚少大反應，善果就換來坦白的相處，佢哋佢哋從來唔怕認衰認錯，因此毋需要向我哋講大話。

而另一樣我時常提醒自己嘅係，愛兒女所愛。時代唔同了，我哋大人鍾意嘅事物，佢哋未必認同，所以我哋唔可以將自己一套，套落佢哋度，迫佢哋跟章。好似早前兩個仔影學校相，我將自己認為襯落灰色佈景會好睇嘅衫褲，預備畀佢哋。但出門時發現佢哋冇換到，佢哋着番平日返學舒服嘅 Tee 同 sweatpants。我當然係有啲唔鍾意啦，影相梗係想佢哋型仔啲 smart 啲。

呔仔問題令呔媽反思
但當我問點解唔着媽咪畀佢哋果套衫時，大仔問咗一個問題，唔係串嘴反叛問，佢認真問：「媽咪，係我picture day，點解你想決定我着咩嘅？」咁我就答喇：「唔係我想決定嘅，我只係畀一套我覺得好睇嘅衫褲你，多個選擇，咁你當然可以自己做決定啦~」佢諗下，話鍾意依家咁樣着，咁樣影相，我再提醒佈景係灰色，着深色會撞，佢哋話OK，我亦覺得冇必要堅持，我尊重佢哋決定。

結果呔仔同細細着咗自己鍾意嘅衫返學影相。

其實件事我自己幾大反思，仔開始大了，有自己思想，我覺得放手都係好事。自己的意見被尊重接納，其實好重要，亦能建立自信，應該冇人鍾意自己的決定被人不停turn down，一定要跟人哋果套吧！

久而久之佢哋會對提出想法失去興趣，亦會變成一個只懂聽從，冇自己主見嘅人。我還在學習中，點樣去做一個開通嘅父母，要尊重小朋友嘅決定。第時兩個仔長大了，同樣哋，我哋只能依自己經歷提醒佢哋行條比較暢順嘅路，跟唔跟足，佢哋有權決定，有權選擇自己想過嘅生活，希望佢哋開心舒服就好了。