做父母身教最重要,呔媽 Kelly 慶幸老公不單止說到做到,而且做的比她想像中更加徹底,兩個仔有樣學樣,影響深遠。

「做父母,唔好怕煩,要響小朋友面前做多一點!」呢句說話係我聽我老公講,聽完之後幾讚嘆,因為佢唔係齋講,佢身體力行。

 

 

老公常被朋友讚踏實

自問呢方面我唔夠佢叻,佢真係樣樣嘢都逐個 step 做,唔怕煩,樣樣事都做得好妥當。因為我係快靚正嘅香港人,佢算係響美國大嘅半個香港人,我香港啲朋友見完佢,有時都會話,你老公好外國 feel,好聽叫踏實,哈哈!

 

從前我都會嫌佢多餘呀、慢呀,你知啦我哋呢啲港孩被從小訓練,行步路都快過人,慣咗咩都衝鋒隊咁,覺得用最快嘅方法去解決一件事先唔會浪費時間。但有小朋友後,啲腳步真係要放慢,同埋睇到咁多年來,老公響兩個仔面前做嘅榜樣,我都有啲佩服!

 

大櫃搬去十幾條街以外咁遠,都要親力親為

好似之前我哋要幫親戚搬一個大櫃,由自己屋企搬去佢度大約十幾條街,要上斜落斜,其實簡簡單單幾十蚊美金租部車,一嘢搞掂唔使煩,但老公堅持同仔自己搬。佢話,自己有氣有力,又可叫仔幫手推,一定要比啲責任佢哋,等佢哋知道,唔好咩都諗住用錢搞掂。

 

佢啱,慳咗幾十蚊可以有另外用途,可以儲起佢、捐咗佢,要教啲仔凡事親力親為,自己真係做唔到先再諗辦法。就係咁,佢搵咗架大手推車,托咗個櫃上去縛實,邊做邊教兩個仔點樣縛得穩陣,點樣個櫃會拍落嚟。我響隔離望住佢三父子,果刻有啲眼濕濕,覺得兩個仔有呢個爸爸好幸福(可能我從小就冇爸爸,好感動)。

 

之後同仔一齊推,又叫另一個睇住前後有冇車嚟緊,要大聲通知,大家都各自有責任。到終點時,睇得出兩個仔完成一項任務的滿足感,走時老公仲載住兩個響手推車,推佢哋返屋企,兩個仔好開心!

 

爸爸做人處事,兒子看在眼裡成習慣

呢啲好習慣累積多年,結果兩個仔嘅品行都無令我哋失望。例如佢哋有玩具壞咗,會盡量諗辨法修補,或者壞咗都會諗另一個玩法繼續玩(而佢哋婆婆,即我媽咪,係會即刻話買過新,對,我係咁樣長大的,哈哈)。特別是大仔,佢好唔捨得掉嘢,佢鐘意舊物翻新,其實都係好好嘅習慣,呢啲佢似足爸爸。

 

希望兩個仔長大後,做個有責任感,有安排嘅人,而爸爸從小樹立嘅榜樣,確係令小朋友畢生受用!

 

 

專欄其他好文:

上堂發夢老師叫佢戒食呢樣嘢   http://bit.ly/2vuXA0O

生日 Kelly媽記湊仔 9 年多感觸   http://bit.ly/2BAkXZG