大家都應該珍惜小朋友每個不完美時刻,唔好心急迫佢哋快快長大,每件事都有時有候…

早前聖誕節小朋友喺學校好多時都有聖誕表演。我又記起大仔剛讀幼稚園時,第一次聖誕節上台表演唱歌,是全級一齊唱的。企喺正正台中間嘅佢,由上台喊到落台,仲要唔係低頭飲泣,係仰天長喊!佢大喊個樣同其他同學開開心心唱聖誕歌嘅畫面相映成趣,引到全場家長大笑。

 

回憶初次登台大喊

如果果個係你嘅小朋友,當刻可能好多父母都會覺得尷尬,甚至唔開心,會責備小朋友,覺得點解其他小朋友都做得到,而自己嘅小朋友會咁冇用,會當眾出醜?但如果做父母嘅可以撇開面子問題,用心去感受小朋友當時惶恐不安,其實佢哋嘅反應只不過係正常小朋友嘅表現,我哋唔需要有咁多負面想法。

 

反而,我覺得做父母應該表揚小朋友有付出同勇敢嘅一面,畀佢哋知道你嘅努力,爸爸媽媽係睇得到的。藉此增加佢哋,今次只係爭少少,下次一定會做得更好!要記住,每個小朋友都係獨一無二的,就只有我哋先至最明白自己小朋友個性,先最清楚應該用點樣嘅態度同小朋友一齊面對每個挑戰。

 

如果連我哋都責怪,都唔明白自己嘅小朋友,呢個世界就冇人明白佢哋架喇。

 

冇期望反而有驚喜

大仔 3 年級了,今年冇聖誕表演,但同級舉行左一個 Publishing Party,係每個學生出版一本書仔,自己寫一個故事,然後公開朗讀,仲要叫埋各位家長觀賞。呢個活動對大仔嚟講,係畀聖誕表演一大班人上台唱歌更加恐怖!

 

佢表演前幾日已極度擔心,覺得自己唔會做到。經我同爸爸一輪安慰鼓勵又多少少信心,但仍有壓力。當日我有去睇佢,心諗一定係讀得斷斷續續又細聲,不過知佢抖啖大氣行上台,都好勇敢架喇!

 

性格如此,不敢奢望。結果佢竟然讀得好好喎,冇怯場,又清楚又大聲,我真係始料不及,個感覺好驚喜!真係睇住佢大個仔了,成功面對挑戰。

 

其實小朋友總會長大,到而家你叫佢哋再企響台中間大喊,已經唔會再發生了。回望小時候,佢哋自然流露嘅童真,實在係非常可愛,回憶亦係非常珍貴的。我想大家都應該珍惜小朋友每個不完美時刻,唔好心急迫佢哋快快長大,每件事都有時有候,我哋就好好活在當下,享受當下吧!

 

專欄其他文章:

生日 媽記湊仔 9 年多感觸    http://bit.ly/2BAkXZG

人際關係課 無謂告發同學帶玩具返學    http://bit.ly/2xaOB5Q