付出時間愛孩子

我地呢一代既大人，手機 ipad 已在日常生活不可或缺。特別是我而家上網賣手袋(Brandsss@Facebook)，比以前更多時間用手機覆客，有時呔仔細細都會叫我放低手機，唔好成日用電話，會近視！自知用多了壞眼，除工作需要外都盡量少用，留返D精力同小朋友玩。至於2個仔，完全無篤電話習慣，其實係歸功於爸爸的！

由細到大，我地一家人出外食飯，爸爸總會提醒呔仔細細自備娛樂。小時候帶車仔，大少少佢地就自己執玩具放落小背包，再大少少佢地識畫公仔，就預備顏色筆同畫簿，又或帶書睇都係非常好既選擇。呔仔細細都係活躍小朋友，一坐底點菜後，等食期間一定嗌悶，所以無帶野消磨時間就麻煩架喇！準備呢D唔係難事，而係，呔仔細細一定會捉爸爸陪佢地玩，所以我話呢個功勞一定係歸於爸爸！父母肯付出時間同心機陪佢地玩，小朋友先唔稀罕長期對住個無互動既螢幕。

每次外膳，爸爸都好落力陪佢地玩，由細細個搣紙碎粒粒擺落小貨車扮送雞蛋貨物，到而家畫畫接住講故事都係咁有趣。爸爸會同佢地一邊畫畫一邊創作故事，你一句我一句，2個仔每次都非常投入，又會不停叫我睇佢地畫左D咩，點樣攪笑法！開心過後，小朋友食飯都落力左，因為快快手食完野，又可以有時間繼續玩。

2個仔思想好廣闊，會不停問D奇怪問題，又經常諗D好古怪既野，對事物有強烈求知慾，相信同我地經常傾計有關。特別是呔仔，佢每次都係由上車講野講到落車，傾計既內容係天南地北。我好鐘意佢地咁架，想知咪問囉！有時見到D小朋友好多問題，但就因為大人一句：好煩呀，點解你咁多野問架！ 然後小朋友唔再問喇，寧願對住部電話仲開心，可能你會覺得正呀！唔使煩住晒可以抖下靜下，其實過左佢需要你既時期，佢就唔再需要你架喇。見過好多一家人出去食飯，仔女各自塞住耳仔聽歌篤電話，成餐飯可以一句說話都無。無話岩定錯既，係睇你想仔女既關係如何。而仔女既成長心態絕對會受父母影響，想仔女長大後會係一個充滿愛同正能量既人，而家對子女既付出一定唔會白費的！