怕醜=沒禮貌？

早前朋友傾訴湊女問題，佢記得呔仔細細之前有段時間好怕叫人，遇到唔熟悉既叔叔姨姨甚至會喱響我身後，又有段時間有人黎屋企時佢地會喱埋響桌底，所以問我點攪法。朋友個女快3歲，正經歷呢個階段，佢話之前都唔係咁樣，係有幾次屋企人話佢唔叫人無禮貌，就開始怕人，情況嚴重，之後無再話佢，又好返少少，但都好似驚驚青青咁，無之前咁正常，覺得佢唔開心，驚左返學要同老師打招呼。朋友話而家都由佢，願意叫就叫，唔叫都唔會迫佢，咁樣先慢慢好轉。但由於讀緊幼稚園，見到老師唔叫既話，老師會話佢無禮貌，所以有時情況尷尬。講到呢度真係有D火，做得幼稚園老師，理應非常了解小朋友情緒，點樣可以安撫佢地小小心靈，令佢開開心心鍾意返學，所謂有教無類，點解咁無愛心，咁唔了解小朋友需要，根本唔適合教幼稚園！

首先，齋聽件事，我地都知道問題唔係出現響小朋友身上，而係大人點樣去處理小朋友既情緒。有D小朋友好需要安全感，其實當佢地覺得環境舒適安全時，例如warm up後大家熟悉了，佢地係會叫人的。真係唔明點解D大人咁鍾意一見面就迫小朋友叫人，叫左你會識飛嗎? 我唔係話要由得佢地無禮貌，但我覺得一個小朋友有無禮貌，並唔係佢叫你一聲可以証實得到！我都見過唔少精甩尾既細路，離遠已經大大聲叫人，可惜相處時打尖爭大份推人貪心咩都齊，你覺得佢叫你一聲就係有家教有禮貌嗎? 係咪要咁膚淺先? 當然我會教呔仔細細叫人，要打招呼，呢個係基本禮貌，但不適用於幼齡兒童，即係，佢連自己既情緒都未控制到既時候，你迫佢叫，其實亳無意思。到入小學喇，佢開始懂性時，知道點解要叫人，係對別人同自己一種禮貌同尊重，到時候佢唔肯叫，你先勞嘈都未遲。

須知道每個小朋友個性不同，根本唔可以用同一把尺去量度，即使同一方式去教，出黎既效果可以完全唔同。無錯2歲時你叫佢叫人，佢聽你講去叫，你覺得佢好乖，但到3歲，4歲呢? 佢開始用小腦袋去思考，開始有好多我地覺得好無聊，但對佢地黎講係好認真既問題，點解我要叫人既? 我唔叫會點架? 我開始識得驚人喇喎，點解我唔叫佢，大人會唔開心既? 點解會鬧我罰我? 感覺不安更加唔敢出聲了… 又，唔係個個小朋友都咁外向咁識交際架喎，有D小朋友內向慢熱，你要令佢明白件事，唔可以只係比壓力，而係要解釋佢知，點解要咁做，做左會點，唔做又會點等等。一句車埋去 “你唔叫人咁無禮貌架！”除左令佢難受，其實完全無意義！

普遍黎講，而家D細路比班大人攪到咁早熟，幼稚園畢業好似大學畢業咁，個個見到大人見到老師爭住叫，而自己果件私私縮縮，當然不好過，但我都係果句啦，個小朋友係自己既，我先係佢媽咪，我先最清楚最了解佢性格，我係唯一一個出到外面可以保護佢既人。父母係仔女最信任既人，下次遇到呢D情況，唔使怕唔好意思，更加唔好跟人地話埋一份，要出聲保護佢地，建立信任係良好親子關係重要既一步！
階段黎架，正常一個人唔會成世唔同人打招呼，好似呔仔細細之前咁內向咁怕人，上到小學咪又唔同晒，唔好執著於一時自困，比多D空間小朋友發展吧，我地係正常教仔，唔係軍訓，外界壓力已大，我地更要擔當好幫小朋友減壓既角色，令小朋友快樂成長！寫呢篇文章搵返佢地細個D痴身相，好仲懷念佢地需要我既安全感，過得好快，而家返學唔比我goodbye kiss喇，話放學先喎，咪比同學仔睇到我跟實晒添呀！哈哈！